عرب اسلامی سربراہی اجلاس کے اختتام پر وزیراعظم پاکستان شہباز شریف اور امریکی صدر ڈونلڈ ٹرمپ کے درمیان خوشگوار ماحول میں غیر رسمی ملاقات ہوئی۔ دونوں رہنماؤں نے گرم جوشی سے مصافحہ کیا اور دوستانہ انداز میں مختصر گفتگو کی۔ اس موقع پر نائب وزیراعظم اسحاق ڈار بھی موجود تھے۔
سفارتی ذرائع کے مطابق وزیراعظم شہباز شریف اور صدر ٹرمپ کے درمیان 25 ستمبر کو ایک ون آن ون ملاقات کا امکان ہے جس میں اہم علاقائی و عالمی امور پر تفصیلی بات چیت متوقع ہے۔ وزیراعظم 26 ستمبر کو اقوام متحدہ کی جنرل اسمبلی سے خطاب بھی کریں گے۔
ادھر اقوام متحدہ کی جنرل اسمبلی کے اجلاس کے دوران وزیراعظم شہباز شریف نے نجی نیوز چینل کو خصوصی انٹرویو دیتے ہوئے کہا کہ امریکی صدر عالمی امن کے قیام کے لیے سنجیدہ اقدامات کر رہے ہیں۔انہوں نے کہا کہ صدر ٹرمپ کے خطاب میں اہم نکات شامل تھے اور انہوں نے پاک بھارت کشیدگی کم کرنے میں بھی کلیدی کردار ادا کیا ہے۔
وزیراعظم شہباز شریف نےکہا کہ پاکستان خطے میں امن و استحکام کے فروغ کے لیے ہر ممکن تعاون کرے گا اور عالمی برادری کے ساتھ مل کر مسائل کے حل کی تلاش میں سرگرم رہے گا۔