امریکہ کے صدر ڈونلڈ ٹرمپ نے کہا ہے کہ ان کا ملک دنیا میں امن کے لیے اپنا کردار ادا کرے گا۔منگل کو اقوام متحدہ کی جنرل اسمبلی کے 80ویں اجلاس سے خطاب کرتے ہوئے انہوں نے کہا کہ اگر میں اس وقت امریکی صدر ہوتا تو حماس اسرائیل اور روس یوکرین جنگیں شروع نہ ہوتیں۔‘انہوں نے اپنے خطاب میں اس حوالے سے مزید کہا کہ ’میں نے پاکستان اور انڈیا کی جنگ سمیت دنیا میں سات جنگیں رُکوائیں اور لاکھوں انسانوں کی زندگیاں بچائی ہیں۔‘’سب سمجھتے ہی کہ امن کی کوششوں پر مجھے نوبیل انعام ملنا چاہیے میں انعام میں نہیں لوگوں کی زندگیاں بچانے میں دلچسپی رکھتا ہوں۔‘واضح رہے کہ یہ ڈونلڈ ٹرمپ کا اپنے دوسرے دورِ صدارت کے دوران اقوام متحدہ کی جنرل اسمبلی کے اجلاس سے پہلا خطاب تھا جو ایک گھنٹہ جاری رہا۔’اقوام متحدہ اپنی صلاحیت کے مطابق کام نہیں کر رہی‘امریکی صدر نے کہا کہ ’میں نے سات جنگیں ان ممالک کے قائدین سے بات کر کے رکوائی ہیں، جنگ بند کروانے کے عمل میں اقوام متحدہ نے کوئی رابطہ یا کردار ادا نہیں کیا۔‘بین الاقوامی ادارے کو تنقید کا نشانہ بناتے ہوئے انہوں نے مزید کہا کہ ’اقوام متحدہ اپنی صلاحیت کے مطابق امن کے لیے کام نہیں کر رہی۔ سوچتا ہوں کہ اقوام متحدہ کو بنانے کا مقصد کیا تھا۔ میں اس ادارے میں اصلاحات لانا چاہتا ہوں۔‘امریکی صدر نے اپنے خطاب میں مسئلہ فلسطین کا ذکر کرتے ہوئے کہا کہ ’غزہ میں انسانی بحران کے خاتمے کے لیے فوری جنگ بندی کا معاہدہ ہونا چاہیے۔‘’حماس کی وجہ سے ابھی تک جنگ بندی کا معاہدہ نہیں ہوا، حماس کو تمام یرغمالیوں کو رہا کرنا ہوگا۔‘ڈونلڈ ٹرمپ کا کہنا تھا کہ ’ہمیں فوراً تمام 20 یرغمالیوں کو زندہ واپس لانا ہے اور 38 یرغمالیوں کی لاشیں بھی واپس چاہتے ہیں۔‘ڈونلڈ ٹرمپ کا کہنا تھا کہ ’غیر قانونی تارکین وطن کی وجہ سے یورپی ممالک جہنم بننے جا رہے ہیں‘ (فائل فوٹو: اے ایف پی)فلسطین کو تسلیم کرنے پر مغربی ممالک پر تنقیدانہوں نے کینیڈا، آسٹریلیا، برطانیہ اور فرانس کی جانب سے فلسطین کو تسلیم کرنے کے فیصلے کو تنقید کا نشانہ بناتے ہوئے کہا کہ ’یہ فیصلہ حماس کو انعام دینے کے مترادف ہے، جس سے خطے میں بداعتمادی مزید بڑھے گی۔‘’یورپی ممالک روس سے تیل خریدنا بند کردیں‘یوکرین کی جنگ سے متعلق امریکہ کے صدر ڈونلڈ ٹرمپ کا کہنا تھا کہ ’چین اور انڈیا روس کا تیل خرید کر یوکرین کی جنگ کو فروغ دے رہے ہیں۔‘صدر ٹرمپ نے یورپی ممالک پر زور دیا کہ ’وہ روس سے تیل کی خریداری بند کردیں۔ روس نے یوکرین کے ساتھ جنگ بندی کا معاہدہ نہ کیا تو اس پر بھاری ٹیرف عائد کردیں گے۔‘’ایران کو ایٹمی ہتھیار حاصل نہیں کرنے دیں گے‘انہوں نے کہا کہ ’امریکہ نے ایران کی ایٹمی تنصیبات کو کامیابی سے نشانہ بنایا، ایران کو کبھی بھی جوہری ہتھیار حاصل نہیں کرنے دیں گے۔‘’غیر قانونی تارکین وطن یورپ کے لیے بھی بڑا مسئلہ بن چکے ہیں‘صدر ٹرمپ کا کہنا تھا کہ ’غیرقانونی تارکین نہ صرف امریکہ بلکہ یورپ کے لیے ایک بڑا مسئلہ بن چکے ہیں، اس مسئلے سے نمٹنے کے لیے اقدامات کرنا ہوں گے۔‘انہوں نے واضح کیا کہ ’اگر کوئی غیر قانونی طور پر امریکہ میں داخل ہوا تو اسے جیل جانا پڑے گا۔‘امریکی صدر نے جنرل اسمبلی سے خطاب میں موسمیاتی تبدیلی کو ایک دھوکہ قرار دیا (فائل فوٹو: اے ایف پی)یورپی رہنماؤں کو مخاطب کرتے ہوئے امریکی صدر کا کہنا تھا کہ ’غیر قاونی تارکین وطن کی وجہ سے آپ کے ممالک جہنم بننے جا رہے ہیں۔‘’موسمیاتی تبدیلی ایک دھوکہ ہے‘امریکی صدر ڈونلڈ ٹرمپ نے اقوام متحدہ کی جنرل اسمبلی سے خطاب میں موسمیاتی تبدیلی کو ایک دھوکہ قرار دیتے ہوئے کہا کہ ’قابل تجدید توانائی کی بلند لاگت دنیا اور ہماری زمین کے بڑے حصے کو تباہ کر رہی ہے۔‘
’لندن کا میئر شریعت نافذ کرنا چاہتا ہے‘
ڈونلڈ ٹرمپ نے اپنی تقریر میں لندن کے میئر صادق خان کو تنقید کا نشانہ بناتے ہوئے انہیں ’خوفناک میئر‘ قرار دیا۔انہوں نے کہا کہ صادق خان شریعت نافذ کرنا چاہتے ہیں، لیکن آپ ایک مختلف ملک میں رہ رہے ہیں، آپ ایسا نہیں کر سکتے۔‘، خراب ٹیلی پرامٹر اور خراب ایسکلیٹر کا تذکرہڈونلڈ ٹرمپ اپنے خطاب میں طنز اور مزاح کا استعمال بھی کرتے رہے، اپنی تقریر کے آغاز میں ہی انہوں نے اقوام متحدہ کی عمارت کے ایسکلیٹر خراب ہونے کا ذکر کیا۔اس کے ساتھ ہی انہوں نے یہ بھی بتایا کہ ’ان کے سامنے جو ٹیلی پوامپٹر ہے وہ بھی خراب ہے۔‘ اس پر ہال میں موجود غیر ملکی سربراہان اور مندوبین ہنسنے لگے۔ صدر ٹرمپ کے خطاب شروع ہونے کے 10 منٹ بعد ٹیلی پرامپٹر چلنا شروع ہو گیا۔اس موقعے پر انہوں نے کہا کہ ’ابھی ابھی ٹیلی پرامپٹر نے کام کرنا شروع کردیا ہے، لیکن لگتا ہے کہ مجھے پرانے انداز سے ہی اپنی تقریر جاری رکھنی چاہیے، یہ نسبتاً آسان ہے۔‘