نیشنل سائبر کرائم انویسٹی گیشن ایجنسی نے یوٹیوبر رجب بٹ کے خلاف جوا اور سٹے بازی والی ایپس کی تشہیر پر مقدمہ درج کر لیا ہے۔ ایف آئی آر کے مطابق رجب بٹ نے سوشل میڈیا پر ویڈیوز اور اشتہارات کے ذریعے عوام کو جوا اور سٹے بازی میں سرمایہ کاری پر اکسایا جس سے لوگوں کی محنت کی کمائی ضائع ہوئی۔
ایف آئی آر کے مطابق رجب بٹ ایک مشہور بیٹنگ ایپ کے برانڈ ایمبیسیڈر بھی رہے ہیں۔ انہیں متعدد بار نوٹس جاری کیے گئے تاہم وہ انکوائری کے لیے پیش نہ ہوئے جس پر ان کے خلاف مقدمہ درج کیا گیا۔
این سی سی آئی اے کے مطابق جوئے اور سٹے بازی کے فروغ کے خلاف کریک ڈاؤن جاری ہے۔ رجب بٹ کے ساتھ ساتھ مزید دو یوٹیوبرز انس علی اور ہریرا کے خلاف بھی ایسے ہی الزامات پر مقدمات درج کیے گئے ہیں۔
تحقیقی ادارے کے مطابق سوشل میڈیا کے ذریعے جوا اور بیٹنگ ایپس کو پروموٹ کرنے والوں کے خلاف سخت کارروائی عمل میں لائی جائے گی تاکہ عوام کو مالی نقصان سے بچایا جا سکے۔