ڈرگ کورٹ میں ادویات کی غیر قانونی تشہیر کے مقدمے میں اہم پیش رفت ہوئی ہے۔ عدالت نے ٹک ٹاکر حکیم شہزاد کے ناقابلِ ضمانت وارنٹ گرفتاری جاری کر دیے۔
تفصیلات کے مطابق چیئرمین ڈرگ کورٹ لاہور نوید رانا نے ڈسٹرکٹ پولیس آفیسر کو حکم دیا ہے کہ حکیم شہزاد کو گرفتار کر کے 24 ستمبر کو آئندہ سماعت پر عدالت میں پیش کیا جائے۔
یاد رہے کہ حکیم شہزاد کے خلاف ادویات کی غیر قانونی تشہیر پر مقدمہ درج کیا گیا تھا۔ حکیم شہزاد سوشل میڈیا پلیٹ فارمز، خصوصاً ٹک ٹاک پر اپنی وڈیوز کے ذریعے مختلف ادویات اور نسخوں کی تشہیر کرتے رہے ہیں جس پر قانونی کارروائی کا آغاز ہوا۔
قانونی ماہرین کا کہنا ہے کہ غیر رجسٹرڈ اور غیر مصدقہ ادویات کی تشہیر عوامی صحت کے لیے خطرناک ثابت ہو سکتی ہے اسی وجہ سے عدالت نے سخت مؤقف اپناتے ہوئے حکیم شہزاد کے ناقابلِ ضمانت وارنٹ گرفتاری جاری کیے ہیں۔