لاہور انسداد دہشت گردی عدالت نے 9 مئی کے جلاؤ گھیراؤ سے متعلق دو مقدمات کا فیصلہ سناتے ہوئے پاکستان تحریک انصاف کے وائس چیئرمین شاہ محمود قریشی کو بری کر دیا جبکہ سابق صوبائی وزیر ڈاکٹر یاسمین راشد، سینیٹر اعجاز چوہدری، سابق وزیر میاں محمود الرشید اور سابق گورنر پنجاب عمر سرفراز چیمہ کو 10، 10 سال قید کی سزا سنائی گئی۔
فیصلہ اے ٹی سی کے جج منظر علی گل نے کوٹ لکھپت جیل میں سنایا جہاں دو مقدمات تھانہ شادمان جلاؤ گھیراؤ اور جناح ہاؤس کے قریب گاڑیاں جلانے کی سماعت ہوئی۔
عدالت نے پی ٹی آئی رہنماؤں عالیہ حمزہ اور صنم جاوید کو بھی 5، 5 سال قید کی سزا دی جبکہ 12 دیگر ملزمان کو بری کر دیا گیا۔ بری ہونے والوں میں سہیل خان، اویس، رفیع الدین، فرید خان، سلمان احمد، عبدالقادر، فیضان، طیب، سلطان، شاہد بیگ، ماجد علی اور بخت روان شامل ہیں۔
مقدمات میں مجموعی طور پر 45 ملزمان کا ٹرائل ہوا، جن میں سے 25 گرفتار، 15 اشتہاری اور ایک ملزم وفات پا چکا ہے۔
یاد رہے کہ چند روز قبل بھی انسداد دہشت گردی عدالت نے 9 مئی کے دیگر جلاؤ گھیراؤ مقدمات میں عمر ایوب، شبلی فراز اور دیگر رہنماؤں کو سزائیں سنائی تھیں۔