کراچی کو بجلی فراہم کرنے والے ادارے کے الیکٹرک نے اپنے صارفین کے لیے بجلی کے بل کی نئی شکل متعارف کرادی ہے، جو پہلے سے زیادہ واضح، منظم اور ماحول دوست ہے۔
ترجمان کے الیکٹرک کے مطابق اس نئے بل میں کوئی نیا ٹیرف یا سلیب شامل نہیں کیا گیا، بلکہ اس کا ڈیزائن تبدیل کرکے معلومات اور حسابات کو ایک ہی جگہ پر یکجا کردیا گیا ہے تاکہ صارفین کے لیے تفصیلات سمجھنا آسان ہو جائے۔ ساتھ ہی یہ تبدیلی کمپنی کے ماحول دوست عزم کا حصہ ہے۔
کے الیکٹرک کے مطابق صارفین نئے ڈیزائن کی تفصیلات کمپنی کی ویب سائٹ پر ملاحظہ کرسکتے ہیں۔ اس سے قبل 2022 میں بھی بل کے ڈیزائن میں تبدیلی کی گئی تھی، جب ہرے رنگ کا چھوٹے سائز کا بل متعارف ہوا تھا۔ اس اقدام سے 92 ٹن کاغذ کا فضلہ کم کرنے، 4200 سے زائد درختوں کو بچانے اور سالانہ 265 ملین لیٹر پانی کی بچت ممکن ہوئی تھی۔