"ماں کی محبت گھر کی دھڑکن ہوتی ہے؛ اس کے بغیر زندگی بے رونق لگتی ہے۔ بچوں کی زندگیوں میں ماں کی محبت کا اثر بے حد ہوتا ہے۔ ہمیشہ اپنی ماں کی عزت کریں اور زیادہ سے زیادہ وقت ان کے ساتھ گزاریں۔"
پاکستانی فلم انڈسٹری کی نامور اداکارہ، پروڈیوسر اور ڈائریکٹر ریما خان نے اپنی شاندار اداکاری اور دلکش شخصیت سے ہمیشہ مداحوں کے دل جیتے ہیں۔ ریما خان، جو ہمیشہ اپنی نجی زندگی کو بہت محدود رکھتی ہیں، نے پہلی بار اپنی والدہ کے ساتھ ایک تصویر شیئر کی ہے، جو ان کے مداحوں کے لیے ایک جذباتی لمحہ بن گیا۔
ریما خان اپنے خاندان سے بے حد محبت کرنے والی شخصیت کے طور پر جانی جاتی ہیں۔ وہ ایک فرض شناس بیوی، ایک ذمہ دار ماں اور ایک پیار کرنے والی بیٹی ہیں۔ اپنی والدہ کے لیے جذباتی محبت کا اظہار کرتے ہوئے ریما نے مداحوں کو انمول پیغام دیا۔
ریما نے اپنی پوسٹ میں لکھا کہ ماں کی محبت بچوں کی زندگی میں سب سے اہم کردار ادا کرتی ہے اور اسے کسی پیمانے پر ناپا نہیں جا سکتا۔ انہوں نے مداحوں کو مشورہ دیا کہ وہ اپنی ماؤں کی عزت کریں اور ان کے ساتھ زیادہ سے زیادہ وقت گزاریں۔
ریما خان کی پوسٹ نے مداحوں کے دلوں کو چھو لیا۔ ان کے مداحوں نے ان کی والدہ کی تعریف کی اور ان کے لیے دعائیں کیں۔ بہت سے لوگ ریما کی والدہ کی خوبصورتی اور دلکش شخصیت دیکھ کر حیران رہ گئے۔