قومی کرکٹ ٹیم کے آل راؤنڈر فہیم اشرف کے گھر دوہری خوشیوں کی آمد ہوئی ہے، جہاں جڑواں بیٹوں کی پیدائش نے پورے خاندان کو خوشیوں سے نہال کر دیا۔
خاندانی ذرائع نے تصدیق کی ہے کہ فہیم اشرف کی اہلیہ نے صحت مند جڑواں بیٹوں کو جنم دیا ہے۔ اس مبارک موقع پر نہ صرف والدین بلکہ پورا خاندان خوشی سے جھوم رہا ہے۔
فہیم اشرف کے والد نے یہ خوش خبری دیتے ہوئے بتایا کہ ان کے گھر میں دو ننھے مہمانوں کی آمد ہوئی ہے، اور ماں اور بچے دونوں خیریت سے ہیں۔ پوتوں کی آمد پر وہ اپنی خوشی چھپا نہ سکے اور دعا دی کہ یہ دن ان کے لیے مزید برکتیں لے کر آئے۔
یاد رہے کہ قومی کرکٹر فہیم اشرف نے پچھلے سال 25 نومبر کو شادی کی تھی، اور اب ان کی زندگی کا یہ نیا باب خوشیوں کا نیا سفر لے کر آیا ہے۔
خاندانی جشن کی یہ خبر مداحوں کے لیے بھی مسرت کا باعث بنی، جو سوشل میڈیا پر اپنے پسندیدہ کھلاڑی کو مبارکباد کے پیغامات دے رہے ہیں۔