آئی سی سی نے بھارتی کرکٹ بورڈ سے پاکستان نہ آنے کی تحریری وجوہات طلب کر لی ہیں۔
تفصیلات کے مطابق، پاکستان کرکٹ بورڈ نے بھارتی خط کا تحریری مسودہ آئی سی سی سے مانگا تھا کیونکہ بھارتی بورڈ نے زبانی طور پر پاکستان کا دورہ نہ کرنے سے آگاہ کیا تھا۔ اب آئی سی سی نے بھارتی کرکٹ بورڈ سے اس معاملے پر مکمل وضاحت تحریری شکل میں دینے کا مطالبہ کیا ہے۔
محمد عامر نے چیمپئنز ٹرافی کے معاملے پر پاکستان کرکٹ بورڈ کی کوششوں کو سراہتے ہوئے کہا ہے کہ اس مؤقف کو سپورٹ کرنا ضروری ہے۔
اطلاعات کے مطابق، اگر پاکستان کو بھارتی موقف کی تحریری وضاحت موصول ہوئی، تو وہ اس کے حق میں مضبوط شواہد کی بھی طلبی کر سکتا ہے۔ قوانین کے مطابق، بھارتی بورڈ کو اپنے انکار کی ٹھوس وجوہات فراہم کرنا ہوں گی، جن کا جائزہ لینے کے بعد آئی سی سی بھارت کے بارے میں فیصلہ کرے گا۔
اگر بھارتی وجوہات ناکافی ثابت ہوئیں، تو بھارت کو ٹیم بھیجنے پر مجبور کیا جا سکتا ہے، بصورت دیگر چیمپئنز ٹرافی میں ایک اور ٹیم کو شامل کرنے کا امکان ہے۔
ذرائع کے مطابق، بھارتی ٹیم کے عدم شرکت سے آئی سی سی کو 50 کروڑ ڈالر کا نقصان ہو سکتا ہے، کیونکہ ٹرافی کے نشریاتی حقوق، اشتہارات اور اسپانسر شپ سے ہونے والی آمدنی متاثر ہوگی۔
اسی دوران، یہ بھی کہا جا رہا ہے کہ پاک بھارت کرکٹ میچز نہ ہونے سے بھارتی کرکٹ بورڈ کو تقریباً 10 کروڑ ڈالر کا مالی نقصان اٹھانا پڑ سکتا ہے۔