سندھ کے وزیر ایکسائز شرجیل انعام میمن کی زیر صدارت کراچی میں ہونے والے اجلاس میں بتایا گیا کہ محکمہ ایکسائز نے سالانہ ٹیکس محصولات کا 34 فیصد تین ماہ 23 دن میں حاصل کیا۔
اجلاس میں ٹیکسیشن نظام کے بعد گاڑیوں کی رجسٹریشن اور ٹرانسفر کی سہولت بھی گھر بیٹھے دینے کا فیصلہ کیا گیا۔
شرجیل میمن نے کہا کہ یکم جنوری سے گاڑیوں کی رجسٹریشن اور ٹرانسفر آن لائن ہوجائے گی۔ شہری گھر بیٹھے گاڑیوں کی رجسٹریشن اور ٹرانسفر کرسکیں گے۔
صوبائی وزیر نے کہا کہ سرکاری نمبر پلیٹس لگانے والی گاڑیوں کو بھی چیک کیا جائے، نجی گاڑیوں پر سرکاری نمبر پلیٹس آویزاں کرنے والوں کیخلاف کارروائی کی جائے۔
شرجیل میمن نے کہا کہ گاڑیوں کی رجسٹریشن، ٹیکس ادائیگی اور نمبر پلیٹس کی چیکنگ کیلئے مزید اقدامات کیے جائیں۔
صوبائی وزیر نے کہا نقد ڈیلنگ ختم ہونے سے عوام کو بہترین سہولت ملے گی اور شفافیت کو فروغ ملے گا، حکومت سندھ کے وژن کے تحت ٹیکس ادائیگی کا نظام مزید آسان ہوجائے گا۔ حکومت سندھ بہترین عوامی خدمات کی فراہمی کے لیے پرعزم ہے۔
صوبائی وزیر نے کہا کہ تمام اقدامات کا مقصد عوام کی دشواریوں کا خاتمہ ہے۔
انھوں نے کہا کہ پریمیئم اور پرسنل نمبر پلیٹس کی آن لائن نیلامی کو مزید تیز کرنے کیلئے مہم چلائی جائے۔ زیادہ سے زیادہ لوگوں تک رسائی کو یقینی بنایا جائے تاکہ زیادہ لوگ آن لائن نیلامی میں حصہ لے سکیں۔
شرجیل میمن نے کہا کہ آن لائن نیلامی سے جمع رقم سیلاب متاثرین کے گھروں کی تعمیر کیلئے دی جائے گی۔