سابق پاکستانی ٹیسٹ کرکٹر باسط علی نے بھارتی بولر محمد شامی کو انضمام الحق کے خلاف بولنے پر کھری کھوٹی سنا دی۔
اپنے یوٹیوب چینل پر باسط علی نے سابق کپتان انضمام الحق کے بارے میں توہین آمیز تبصرے کرنے پر بھارتی فاسٹ بولر محمد شامی پر کڑی تنقید کرتے ہوئے کہا کہ، محمد شامی کو اپنے الفاظ کا انتخاب اچھی طرح کرنا چاہیے تھا۔
دراصل انضمام الحق نے ٹی 20 ورلڈ کپ 2024 کے دوران بھارتی فاسٹ بولر ارشدیپ سنگھ کی ریورس سوئنگ پر سوالات اٹھائے تھے، جس کے بعد محمد شامی نے انہیں ’کارٹون گری‘ قرار دیا تھا۔
جس پر باسط علی نے کہا کہ، جب شامی انضی بھائی کے بارے میں بات کرتے ہیں تو انہیں کارٹون کہتے ہیں یہ درست نہیں ہے، ان کا الفاظ کا انتخاب اچھا نہیں، ہم آپ کی بولنگ کی تعریف کرتے ہیں آپ کو سینئر کا احترام کرنا چاہیے۔
باسط علی نے کہا کہ اگر آپ سینئر کی عزت نہیں کریں گے تو کرکٹ آپ کو رلا دے گی۔ براہ کرم ایسا نہ کریں میری آپ سے درخواست ہے۔
سابق کرکٹر نے مزید کہا کہ، آپ سے جب بھی سوال کیا جائے آپ بے ہودہ جواب ہی دیتے ہیں، میں صحیح لفظ استعمال کررہا ہوں، آپ کے بزرگوں نے شاید آپ کو یہ کبھی نہیں سکھایا۔