بلوچستان کے مختلفمیں موسلادھار بارشوں کے دوران آسمانی بجلی اور دیوار گرنے سے بچی اور 2 نوجوان جاں بحق ہوگئے۔
صوبائی ڈیزاسٹر مینجمنٹ اتھارٹی کے مطابق واشک، لورالائی اور موسیٰ خیل میں حالیہ بارشوں، طوفانی ہواؤں اور آسمانی بجلی گرنے سے جانی ومالی نقصانات کی اطلاعات موصول ہوئی ہیں۔
پی ڈی ایم اے حکام کا کہنا ہے کہ واشک میں آبی ریلوں سے مکانات، چار دیواری اور زرعی زمینوں کو بھی نقصان پہنچا ہے جس کا تخمینہ لگانے کے لیے سروے جاری ہے۔
ضلع لورالائی میں دیوارگرنے سے علیزے نامی بچی جاں بحق ہوگئی جبکہ موسیٰ خیل میں آسمانی بجلی گرنے سے عبدالحلیم اور جمال دین نامی نوجوان جاں بحق ہوگئے۔
حکام کے مطابق لورالائی اور ضلع سوراب میں بارش اور طوفانی ہواؤں سے متعدد گھروں اور سولر پینلز کو بھی نقصان پہنچا۔
پی ڈی ایم اے حکام نے آج رات اور کل ڈیرہ بگٹی، نصیر آباد اور صحبت پور میں طوفانی بارش کا امکان ظاہر کیا ہے۔
ڈائریکٹر جنرل پی ڈی ایم اے جہاں زیب خان کے مطابق ممکنہ ہنگامی صورتحال سے نمٹنے کے لیے پی ڈی ایم اے تیار ہے جبکہ متعلقہ محکموں کو بھی الرٹ کردیا گیا ہے۔