آئندہ ماہ پاکستان سپر لیگ کے نویں ایڈیشن کا آغاز ہونے جارہا ہے وہیں مداحوں کو پی ایس ایل کے آفیشل ترانے کا بے صبری سے انتظار رہتا ہے۔
ذرائع کا کہنا ہے کہ پی ایس ایل کے ابتدائی ایڈیشنز میں ترانہ گانے والے معروف گلوکارعلی ظفر سے پی ایس ایل انتظامیہ نے رابطہ کیا لیکن جب لیگ کے فرنچائزز کو یہ بات معلوم ہوئی تو ایک فرنچائز نے علی ظفر کی مخالفت کی اور مزید دو فرنچائزز نے علی ظفر کی مخالفت کرنے والی فرنچائز کی حمایت بھی کی۔
ذرائع کے مطابق علی ظفر کی مخالفت ان پر ہراسانی کے کیس کی وجہ سے کی گئی ہے۔
ذرائع نے کہا کہ فرنچائز کا مؤقف ہے کہ پی ایس ایل بہت بڑا برانڈ بن چکا ہے ، ان کی کوشش اور خواہش ہے کہ کسی تنازع میں نہ پڑیں تو بہتر ہوگا، کسی ایسے گلوکار سے ترانہ بنوایا جائے جو غیر متنازع ہو۔
ذرائع کا کہناہے کہ کچھ فرنچائززنے پی سی بی سے درخواست کی کہ علی ظفر کو نہ لیا جائے، ان کا مقصد کسی کی تضحیک نہیں نہ کسی کو نیچا دکھانا ہے ۔ مقصد صرف یہ ہے کہ پی ایس ایل کے برانڈ کو مزید مضبوط کیا جائے۔
واضح رہے کہ شیڈول کے مطابق پی ایس ایل 9 کا آغاز 17 فروری سے ہو گا اور 18 مارچ تک جاری رہے گا۔