گٹکا کھانا صحت کیلئے انتہائی مضر سمجھا جاتا ہے اور حکومتیں گٹکے کی فروخت روکنے کیلئے طرح طرح کے جتن کرتی ہیں لیکن جب شوبز کے ستارے ایسی خطرناک اشیاء کی تشہیر کیلئے کام کرتے ہیں تو حکومتی کوششیں بیکار چلی جاتی ہیں تاہم بھارت میں گٹکے کے اشتہار میں کام کرنے پر شاہ رخ خان، اکشے کمار اور اجے دیوگن کو نوٹس جاری کردیے گئے ہیں۔
اداکار شاہ رخ خان، اجے دیوگن اور اکشے کمار کوگٹکے کے اشتہار میں کام کرنے پر بھارتی حکومت کی جانب سے دائر درخواست پر نوٹس جاری کیے گئے ہیں، درخواست گزار نے عدالت سے استدعا کی ہے کہ گٹکا کمپنیوں کی تشہیر کرنے پر ان ہائی پروفائل اداکاروں کے خلاف کارروائی کی جائے۔
حکومتی وکیل نے عدالت سے درخواست کی کہ یہ معاملہ سپریم کورٹ میں بھی زیرِ سماعت ہے اور ان اداکاروں کو پہلے ہی گٹکے کے اشتہار میں کام کرنے پر شوکاز نوٹس جاری ہو چکے ہیں لہٰذا یہ عدالت درخواست خارج کر دےتاہم الٰہ آباد کورٹ کے بینچ نے کیس کی سماعت 9 مئی 2024 کو مقرر کر دی ہے۔
اس سے قبل گزشتہ سال اکشے کمار نےمشہور الائچی برانڈ کے برانڈ ایمبیسیڈر کے عہدے سے استعفیٰ دیا تھا اور مداحوں سے معافی بھی مانگی تھی تاہم اداکاروں کی جانب سے مسلسل غیر قانونی اشیاء کی تشہیر کی وجہ سے قانونی کارروائی کا آغاز کردیا گیا ہے۔