بھارتی اداکارہ اروشی روٹیلا نے پاکستان اور بھارت کے درمیان میچ کے دوران اسٹیڈیم میں گم ہونے والا سونے سے بنا آئی فون ڈھونڈنے والے کیلئے انعام کا اعلان کردیا ہے۔
1 کروڑ فی منٹ معاوضہ لینے والی ماڈل و اداکارہ اروشی روٹیلا نے سوشل میڈیا پر شہریوں سے مدد کی اپیل کے ساتھ انعام کا اعلان بھی کیا ہے۔انہوں نے انسٹاگرام پر اپنے فون کی لوکیشن شیئر کی جو احمدآباد کے ایک مال کی آرہی ہے۔
یاد رہے کہ پاکستان اور بھارت کے درمیان ہفتہ 14 اکتوبر کو ہونیوالے ورلڈکپ کے اہم میچ کے دوران اداکارہ اروشی روٹیلا کا 24 قیراط سونے کا فون گم ہوگیا جس کی قیمت لاکھوں میں تھی۔
بھارتی اداکارہ و ماڈل اروشی روٹیلا نے ایکس پرپوسٹ کرتے ہوئے اپنا فون واپس دینے کی اپیل کرتے ہوئے کہا تھا کہ نریندرا مودی اسٹیڈیم میں پاک بھارت میچ کے دوران میں میرا 24 قیراط کا آئی فون گُم گیا ہے، اگر کسی کو ملے تو براہِ مہربانی میری مدد کریں۔
اداکارہ اروشی روٹیلا نے اپنے گولڈن آئی فون کی گمشدگی کی ایف آئی آر احمد آباد پولیس اسٹیشن میں درج کروادی ہے جبکہ کرکٹ شائقین سے درخواست کی کہ اگر کسی کو آئی فون نظر آئے یا ملے تو برائے مہربانی میری مدد کرتے ہوئے مجھ سے جلد از جلد رابطہ کریں۔