بھارت میں ہونے والے ورلڈکپ 2023 کے دوران پاک بھارت مقابلہ پاکستان کے کپتان بابر اعظم کی سالگرہ کے روز ہونے کا امکان ہے۔
بھارتی کرکٹ بورڈ نے ورلڈ کپ شیڈول فائنل کر کے انٹرنیشنل کرکٹ کونسل کو بھیج دیا ہے جس کے بعد اب ورلڈ کپ کا فائنل شیڈول رواں ہفتے جاری ہونے کا امکان ہے۔
قومی ٹیم کے کپتان بابر اعظم 15 اکتوبر کو اپنی 29 ویں سالگرہ منائیں گے جبکہ اسی روز پاکستان اور بھارت کا میچ بھی ہوسکتا ہے۔آئی سی سی نے فیڈ بیک کے لیے بی سی سی آئی کا شیڈول ورلڈ کپ کھیلنے والے ممالک کے ساتھ شیئر کردیا ہے۔
شیڈول کے تحت پاک بھارت ٹاکرا 15 اکتوبر کو نریندرا مودی اسٹیڈیم میں ہونے کا امکان ہے اور اسی دن بابر اعظم کی سالگرہ بھی ہے۔ورلڈ کپ کا آغاز 5 اکتوبر کو ہوگا، فائنل 19 نومبر کو احمد آباد اسٹیڈیم میں ہوگا۔
یاد رہے کہ 2023 کا کرکٹ ورلڈ کپ بھارت میں ہوگا، ایونٹ میں پاکستان کی شرکت پی سی بی نے ایشیا کپ میں شرکت سے مشروط کی تھی جبکہ بھارتی بورڈ نے ہائبرڈ ماڈل کے تحت ایشیا کپ میں شرکت پر آمادگی ظاہر کردی ہے۔