اوستہ محمد:کمانڈر12 کور لیفٹیننٹ جنرل آصف غفور نے کہا ہے کہ سیلاب متاثرین کی کی بحالی تک چین سے نہیں بیٹھیں گے،بلوچستان میں سیلاب سے متاثرہ ہر ضلع میں ریلیف کیمپ قائم کئے جا رہے ہیںجس میں سیلاب زدگان کیلئے خوراک، پانی، اسکول، بجلی سمیت تمام تر سہولیات دی جا رہی ہیں۔
یہ بات انہوں نے پاک فوج کی جانب سے سیلاب زدگان ریلیف کیمپ اوستہ محمد کا دورے کے موقع پر سیلاب متاثرین سے ملاقات کے دوران بات چیت کر تے ہوئے کہی۔
کمانڈر12 کور لیفٹیننٹ جنرل آصف غفور نے پاک فوج کی جانب سے لگائے گئے کیمپ میں سیلاب زدگان سے ملاقات کے دوران انہیں ریلیف کیمپ میں ہر سہولیات فراہم کر نے کی یقین دہانی بھی کروائی۔
عوام نے ہر دلعزیز افسر کو اپنے درمیان دیکھ کر نہایت خوشی کا اظہار کیا اور پاک فوج زندہ باد کے نعرے لگائے۔ اس موقع پر ڈپٹی کمشنر جعفرآباد رزاق خان ،ایس ایس پی جعفرآباد جواد طارق اسسٹنٹ کمشنر اوستہ محمد ساگر کمار سمیت ضلع کے تمام افسران بھی موجود تھے۔
کمانڈر12 کورلیفٹیننٹ جنرل آصف غفور نے لگائے گئے ریلیف کیمپ،میڈیکل کیمپ،اسکول اور خیموں کا جائزہ بھی لیا۔
لیفٹیننٹ جنرل آصف غفور نے کہا کہ بلوچستان میں سیلاب زدگان کی بحالی تک چین سے نہیں بیٹھیں گے، سیلاب سے متاثرہ ہر ضلع میں ریلیف کیمپ قائم کئے جا رہے ہیں جہاں پر سیلاب زدگان کیلئے ہر سہولیات دی جارہی ہے۔
جن کے گھر سیلاب میں بہہ گئے ہیں ان کیلئے یہ کیمپ بنائے گئے ہیں اور جن کے گھروں کی دیواریں اور چھتیں گر چکی ہیں ان کو گھر وں میں خیمے دیئے جارہے ہیں تا کہ وہ اپنے گھر میں خیموں میں رہ کر گھر بنوا سکیں۔