گزشتہ دنوں لاہور میں انتقال کرنے والی پاکستانی فلم انڈسٹری کی معروف اداکارہ نیلو بیگم کے بیٹے اداکار شان شاہد نے اپنی مرحومہ ماں کی یاد میں ایک دل سوز پیغام جاری کیا ہے۔

تفصیلات کے مطابق شان نے سماجی رابطے کی ویب سائٹ ٹوئٹر پر دیے گئے پیغام میں تحریر کیا کہ ''جب میں نے اپنے والد کو کھویا تو آپ نے مجھے ایک باپ کی طرح سنبھالا''۔

شان شاہد نے کہا کہ ''جب میں چلتا تھا تو اپنی والدہ کے نقش قدم پر چلتا تھا اور جب میں بھاگتا تھا تو وہ ہمیشہ مسکراتے ہوئے فائنل لائن (جہاں راستہ ختم ہوتا تھا) پر موجود ہوتی تھیں''۔

اداکار نے لکھا کہ ''میری والدہ مجھے جو ہدایت دیتی تھیں وہ میرے لیے ایک قانون بن جاتا تھا''۔

اُنہوں نے مزید لکھا کہ ''میں نے اپنے سفر میں جہاں بھی والدہ کو دیکھا تو وہ سفر میرے لیے منزل بن جاتا تھا''۔

یاد رہے نیلو بیگم کا انتقال 80 برس کی عمر میں لاہور میں ہوا۔ اداکارہ نیلو بیگم فلم ڈائریکٹر مرحوم ریاض شاہد کی اہلیہ اور اداکار شان کی والدہ تھیں جبکہ ان کا اصل نام عابدہ ریاض تھا۔ نیلو کافی عرصے سے کینسر کے مرض میں مبتلا تھیں۔

٭ اس حوالے سے اپنی قیمتی رائے کا اظہار ہماری ویب کے فیسبک پیج پر کمنٹ سیکشن میں کرنا نہ بھولیں۔