لندن: پاکستان سمیت دنیا بھر میں جہاں کورونا وائرس کا پھیلاؤ تیزی سے جاری ہے وہیں دنیا بھر کے سائنسدان اس وبا پر قابو پانے کے لئے سر جوڑ کوششوں میں مصروف ہیں۔
انہی کوششوں میں برطانوی ماہرین کی جانب سے یہ کوشش بھی جاری ہے جس میں انہوں نے کورونا کے مریضوں کو اہم معلومات فراہم کرتے ہوئے کہا کہ لوگ اب گھر بیٹھے اپنے تھوک کی مدد سے کورونا وائرس کا ٹیسٹ کرا سکیں گے۔
برطانوی نشریاتی ادارے کے مطابق ماہرین کووڈ انیس سے متعلق ایک ایسے ٹیسٹ کا تجربہ کررہے ہیں جس سے لوگ گھر بیٹھے اپنے تھوک پر ٹیسٹ کرنے سے یہ جان سکیں گے کہ وہ اس وائرس میں مبتلا تو نہیں۔اس ٹیسٹ کے لئے سواب جیسے طریقے کی ضرورت ہی نہیں پڑتی۔
اس ٹرائل میں 14 ہزار سے زائد افراد سمیت ضروری خدمات سرانجام دینے والے ورکرز اور ان کے ساتھ رہنے والے اہلخانہ بھی شامل ہوں گے۔
ساؤتھ ہمپٹن یونیورسٹی کا یہ تجربہ چار ہفتوں تک جاری رہے گا اور ماہرین کو امید ہے کہ تھوک سے ٹیسٹ کرنے کا طریقہ لوگوں کے لیے بہت آسانی پیدا کرے گا۔ سواب کا طریقہ قدرے تکلیف دہ ہے اور اسے ناک یا گلے میں اندر تک لے جانا پڑتا ہے۔
اس تجرے میں شامل یونیورسٹی کےعملے کے کچھ افراد اپنے ہفتے بھر کے تھوک کے نمونے لیب کو مہیا کریں گے۔
ماہرین کے خیال میں اس طریقہ کار کے ذریعے ٹیسٹ کے نتائج باآسانی ایک گھنٹے کے اندر گھر بیٹھے حاصل کئے جا سکیں گے۔ اس وقت سواب کے طریقے سے کورونا وائرس کے ٹیسٹ پر خاصا وقت صرف ہو جاتا ہے۔