اداکارہ و ماڈل عظمیٰ خان پر تشدد کرنے والی ملک ریاض کی بیٹیوں کے خلاف وارنٹ گرفتاری جاری کردیا گیا ہے۔
تفصیلات کے مطابق لاہور کے جوڈیشل مجسٹریٹ کی جانب سے جمعہ کے روز ان 3 خواتین کے اریسٹ وارنٹ جاری کردیے گئے ہیں جنہوں نے اداکارہ کے گھر میں گھس کر ان پر اور ان کی بہن پر تشدد کیا۔
رواں ہفتے کے آغاز میں کچھ ویڈیو کلپس سوشل میڈیا پر وائرل ہوئیں جس میں ملک ریاض کی بیٹیاں اداکارہ عظمیٰ خان کو بری طرح پیٹ رہی تھیں۔
ویڈیو کلپس منظرِ عام پر آنے کے بعد یہ افواہیں گردش کر رہی تھیں کہ عظمیٰ خان نے پیسے لے کر صلح کر لی ہے اور وہ ملک سے باہر شفٹ ہو رہی ہیں جس پر اداکارہ کی ایک ویڈیو سامنے آئی اور انہوں نے ساری افواہوں کی تردید کردی۔
ویڈیو میں عظمیٰ خان کا کہنا تھا کہ آئی جی صاحب سے درخواست ہے کہ وہ مجھ سے ملیں کیونکہ پولیس افسران مجھ سے تعاون نہیں کر رہے اور مجھ پر صلح کیلئے دباؤ ڈالا جا رہا ہے۔