لیفٹ آرم پیسر محمد عامر کو ٹیسٹ کرکٹ سے جلدی ریٹائرمنٹ لینے پر شدید تنقید کا نشانہ بنایا جاتا رہا ہے۔
عامر کا کہنا ہے کہ ہر کسی کی اپنی سوچ ہوتی ہے اور میں اپنے جسم کے حوالے سے زیادہ بہتر جانتا ہوں ، مجھے محسوس ہونے لگا تھا کہ میرے جسم میں حد سے زیادہ بوجھ پڑنے لگا ہے جس سے نمٹنا انتہائی مشکل ہو رہا تھا،ان کا کہنا تھا کہ اپنے کیریئر کو مزید طویل کرنے کے لئے میں نے ٹیسٹ کرکٹ سے ریٹائرمنٹ کا فیصلہ کیا جس میں میری فیملی نے سپورٹ کیا۔
عامر نے مزید کہا کہ فکسنگ میں پابندی کے باعث 5 برس کا لمبا بریک کسی بھی فاسٹ باؤلر کے لئے بہت زیادہ ہوتا ہے،اس کے بعد میں نے لگاتار 3 برس تینوں فارمیٹس میں مسلسل کرکٹ کھیلی، اب میری توجہ صرف ایک چیز پر ہے اور میں خود کو دماغی و جسمانی طور پر تازہ دم محسوس کرتا ہوں،اس کے نتائج بھی سب کے سامنے ہیں۔