پاکستان رواں سال ستمبر کے مہینے میں ہونے والے ایشیا کپ کی میزبانی کرے گا جبکہ سرحدوں پر کشیدگی اور سیکورٹی خدشات کے باعث بھارت اس کا حصہ ہوگا یا نہیں یہ سوال اب تک قائم ہے۔
ایشیا کپ کے میچز پاکستان میں ہونے کی وجہ سے، بھارتی ٹیم کی ٹورنامنٹ میں شمولیت کا ابھی تک فیصلہ نہیں ہو سکا ہے جبکہ حتمی فیصلہ جون میں آنے کا امکان ہے۔
جون میں ایشیا کپ کے حوالے سے بی سی سی آئی کا اہم اجلاس منعقد ہوگا جس میں یہ فیصلہ کیا جائے گا کہ بھارتی ٹیم کو پاکستان بھیجنا ہے یا نہیں۔
پاکستان نے آخری بار ایشیا کپ کی میزبانی 2008 میں کی تھی جبکہ 2009 میں سری لنکن ٹیم پر حملہ ہونے کی وجہ سے کوئی غیر ملکی ٹورنامنٹ پاکستان میں نہیں ہوا۔
یاد رہے دسمبر 2018 میں ہونے والے اے سی سی کے اجلاس میں یہ فیصلہ کیا گیا تھا کہ ایشیا کپ کی میزبانی پاکستان کرے گا۔