صدر بنگلا دیش کرکٹ بورڈ کا دورہ پاکستان سے متعلق اہم اعلان

بنگلا دیش کرکٹ بورڈ  کے صدر نظم الحسن نے کہا ہے کہ بنگلادیشی کرکٹ ٹیم کے دورہ پاکستان پر حکومت کو خط لکھ دیا، قوی امکان ہے کہ کلیئرنس مل جائے گی۔

 تفصیلات کے مطابق  بنگلا دیش کرکٹ بورڈ کے صدر نظم الحسن نے اپنے ایک بیان میں کہا کہ بنگلادیشی ٹیم کو جنوری،فروری میں پاکستان کا دورہ کرتے ہوئے 3 ٹی ٹوئنٹی اور 2ٹیسٹ میچ کھیلنا ہیں۔

بی سی بی کے صدر  نے یہ بھی کہا کہ حکومتی کلیئرنس کے بعد اگلے مرحلے میں کرکٹرز سے پوچھیں گے، ہرکھلاڑی کا اپنا فیصلہ ہوگا کہ وہ پاکستان جانا چاہتا ہے یا نہیں۔

اپنے بیان میں نظم الحسن کا کہنا تھا کہ ہماری ویمنز اور انڈر 16ٹیمیں پاکستان کا دورہ کر چکیں، جونیئر ہو یا سینئر ہر ٹیم کی سیکیورٹی ایک جیسی اہمیت رکھتی ہے۔

 بنگلا دیش کرکٹ بورڈ کے صدر نظم الحسن  کا مزید کہنا تھا کہ  قبل ازیں دونوں ٹیموں کو کلیئرنس دیے جانے کے بعد قوی امکان ہے کہ سینئر مینز ٹیم کو بھی اجازت مل جائے گی، حکومت کو لکھے گئے خط کا جواب  4 سے 5 روز میں موصول ہو جائے گا۔

اس موقع پر چیف ایگزیکٹو نظام الدین نے کہا تھا کہ وقت تھوڑا رہ گیا،ہم تاحال حکومت کی جانب سے کلیئرنس ملنے کے منتظر ہیں،البتہ اب اس حوالے سے مثبت اشارے ملے ہیں۔

یاد رہے کہ اس سے قبل بھی بی سی بی نے دورہ پاکستان کو حکومتی کلیئرنس سے مشروط کرتے ہوئے کہا تھا کہ حکومت کی جانب سے گرین سگنل کا انتظار ہے جس کے بعد ہی کھلاڑیوں سے بات کی جائے گی۔

بنگلا دیش کرکٹ بورڈ کےاعلی حکام نے گزشتہ ہفتےکہا تھا کہ وہ ہفتے کے اندر سیریز کا فیصلہ کر لیں گے لیکن ایک ہفتہ گزرنے کے باوجود بنگلا دیش کی جانب سے پاکستان کو کوئی جواب نہیں دیا گیا ۔