میاں بیوی فلائی اوور سے اچانک کیسے گر پڑے ؟ افسوس ناک واقعہ

لاہور کے علاقے فیصل ٹاؤن میں اکبر چوک فلائی اوور پر ایک افسوسناک حادثے میں میاں بیوی زندگی کی بازی ہار گئے۔

پولیس کے مطابق، اقبال ٹاؤن سے فیروز پور روڈ کی طرف اپنے گھر واپس جانے والے 65 سالہ شیخ افضل اور ان کی اہلیہ عابدہ نور فلائی اوور سے اتر رہے تھے کہ اچانک شوہر کو دل کا دورہ پڑ گیا۔

اچانک طبیعت بگڑنے کے باعث موٹرسائیکل قابو سے باہر ہو گئی اور باؤنڈری وال سے ٹکرا گئی۔ تصادم کے بعد دونوں میاں بیوی نیچے جاگرے۔

حادثے میں 60 سالہ عابدہ نور موقع پر دم توڑ گئیں جبکہ شیخ افضل کو اسپتال منتقل کیا جا رہا تھا کہ وہ بھی جانبر نہ ہو سکے۔ یہ واقعہ نہ صرف خاندان بلکہ اہلِ علاقہ کے لیے بھی گہرے صدمے کا باعث بن گیا۔