سو رہے تھے، ایسا لگا جیسے زلزلہ آگیا۔۔ بھارتی حملے کے وقت کیا ہوا تھا؟ پاکستانی شہریوں نے آنکھوں دیکھا حال بتا دیا

بھارتی فوج نے رات کی تاریکی میں بزدلانہ حملہ کرتے ہوئے آزاد کشمیر کے علاقوں کوٹلی، مظفر آباد اور باغ کے علاوہ مریدکے اور احمد پور شرقیہ میں شہری آبادی کو نشانہ بنایا۔

مرید کے کے نواحی علاقے ننگل ساہداں کے رہائشیوں کا کہنا ہے کہ بھارت نے مقامی مسجد اور اطراف میں یکے بعد دیگر چار حملے کیے۔ مکینوں کے مطابق جس مسجد اور مدرسے پر بھارت نے حملہ کیا وہ ان کے قریب ہی واقع ہے۔

علاقہ مکینوں کا کہنا ہے کہ پہلے ایک دھماکہ ہوا جس کے بعد تین اور دھماکے سنے گئے۔

مقامی شخص عثمان نے جیو نیوز کو بتایا کہ علاقہ مکینوں کے حوصلے بلند ہیں اور وہ پاک فوج کے شانہ بشانہ کھڑے ہیں۔ ان کا کہنا تھا کہ بھارت کو اسی کی زبان میں جواب دیا جائے گا، کیونکہ اس نے اپنی بزدلانہ کارروائی میں سویلین آبادی کو نشانہ بنایا ہے۔

مظفرآباد کے علاقے شوائی سے نقل مکانی کرنے والے ایک خاندان نے بتایا کہ وہ سو رہے تھے کہ اچانک زلزلہ سا محسوس ہوا اور وہ خوف کے عالم میں گھروں سے نکل آئے۔

واضح رہے کہ بھارتی فوج کے بزدلانہ حملے میں دو مساجد شہید ہوئیں جبکہ ایک بچی سمیت 13 پاکستانی شہید اور 36 زخمی ہوئے۔

پاک فوج نے بھارتی کارروائیوں کا بھرپور جواب دیتے ہوئے بھارتی فوج کے 3 رافیل، ایک سکوئی، ایک مگ 29 اور ایک ڈرون تباہ کر دیا جبکہ بھارتی فوج کا بریگیڈ ہیڈ کوارٹر بھی تباہ کردیا۔

پاک فوج کے بھرپور اور تابڑ توڑ حملے کے بعد بھارت نے لائن آف کنٹرول پر سفید جھنڈا لہرا کر شکست تسلیم کر لی۔