بالی ووڈ سپر اسٹار شاہ رخ خان نے انکشاف کیا ہے کہ ان کی زندگی میں کئی ایسے موقعے آئے ہیں جب وہ باتھ روم میں بیٹھ کے روئے ہیں۔
بھارتی میڈیا کے مطابق، گزشتہ روز دبئی میں منعقد ایک تقریب میں شاہ رخ خان نے شرکت کی جہاں انہوں نے اپنی زندگی میں پیش آنے والی ناکامیوں کا ذکر کیا۔
کنگ خان نے اعتراف کیا کہ، وہ اپنی فلموں کی ناکامی پر باتھ روم میں بیٹھ کر روئے ہیں۔ ان کا کہنا تھا مجھے ناکام ہونے کا احساس بہت برا لگتا ہے، اس لیے جب بھی ناکام ہوتا ہوں تو باتھ روم میں بیٹھ کر بہت روتا ہوں لیکن کسی کے سامنے یہ ظاہر نہیں ہونے دیتا کہ مجھے کتنا برا محسوس ہو رہا ہے۔
شاہ رخ خان نے کہا کہ، میں ایسے نازک موقعوں پر مایوس ہونے کے بجائے مثبت سوچ کو ترجیح دیتا ہوں اور خود کو سمجھاتا ہوں کہ شاید مجھ سے ہی کوئی غلطی ہوئی ہے یا پھر میری طرف سے کوئی رہ گئی جس کے باعث مجھے ناکامی کا سامنا ہوا۔
ان کا کہنا تھا، مایوسی میں انسان ہر الٹی بات سوچتا ہے کہ شاید دنیا میرے خلاف ہے اور لوگ مجھے ناکام بنانے کی سازش کر رہے ہیں وغیرہ وغیرہ۔ جبکہ ہمنیں چاہیئے ناکام ہونے کی صورت میں سب سے پہلے اپنی غلطی تسلیم کریں اور اس ناکامی کو زندگی میں کچھ نیا سیکھنے کا موقع سمجھ کر آگے بڑھیں۔