وزیر اعظم شہباز شریف اور سعودی ولی عہد محمد بن سلمان کے درمیان ریاض فیوچر انویسٹمنٹ انیشی ایٹو فورم کے موقع پر ملاقات ہوئی جس میں دونوں ملکوں کے درمیان دو طرفہ تعاون مزید بڑھانے پر اتفاق کیا گیا۔ وزیر اعظم شہباز شریف نے بین الاقوامی مالیاتی اداروں سے متعلق معاملات پر سعودی عرب کی پاکستان کی حمایت پر محمد بن سلمان کا شکریہ ادا کیا۔
اعلامیے کے مطابق دونوں رہنماؤں کے درمیان ملاقات فیوچر انویسٹمنٹ انیشیٹو کے 8 ویں ایڈیشن کے موقع پر سعودی دارالحکومت ریاض میں ہوئی جس میں باہمی دلچسپی کے امور پر تبادلہ خیال کیا گیا۔
وزیراعظم نے شاہ سلمان بن عبدالعزیز کےلیے نیک خواہشات کا اظہار کیا اور صحت و تندرستی کےلیے دعا کی۔
شہباز شریف نے بین الاقوامی مالیاتی اداروں سے متعلق معاملات پر سعودی عرب کی حمایت پر اظہار تشکر کیا اور پاکستانی وفد کی پرتپاک مہمان نوازی پر بھی ولی عہد کا شکریہ ادا کیا۔
اعلامیے میں کہا گیا ہے کہ وزیر اعظم نے فیوچر انویسٹمنٹ کانفرنس کےلیے سعودی ولی عہد کی دور اندیش قیادت کو سراہا اور کہا کہ سعودی وژن 2030 پاکستان کے کلیدی پالیسی مقاصد سے ہم آہنگ ہے۔
دونوں رہنماؤں نے پاک سعودی مضبوط اقتصادی شراکت داری کا اعادہ کیا اور دو طرفہ تجارت، سرمایہ کاری اور اقتصادی تعاون مزید بڑھانے پر اتفاق کیا۔