ریسٹورینٹ سے قیمتی گاڑی کہاں غائب ہوگئی؟ شلپا شیٹھی بڑی مصیبت میں پھنس گئیں

ممبئی میں شلپا شیٹھی کے دادار ریسٹورینٹ سے 80 لاکھ روپے مالیت کی بی ایم ڈبلیو چوری کا دلچسپ واقعہ سامنے آیا ہے۔ باندرہ کے تاجر روحان خان نے ممبئی کے شیواجی پارک پولیس اسٹیشن میں گاڑی چوری کی ایف آئی آر درج کروائی ہے، جس کے بعد پولیس نے گاڑی کی تلاش شروع کر دی ہے۔

رپورٹس کے مطابق، روحان خان اپنے دوستوں کے ساتھ ریسٹورینٹ میں وقت گزار رہے تھے اور گاڑی کی چابیاں ریسٹورینٹ کے گارڈز کے حوالے کر دی تھیں۔ چند ہی منٹ بعد، دو نامعلوم افراد جدید ہیکنگ تکنیک استعمال کرتے ہوئے گاڑی کے دروازے کھولتے ہیں اور ایک شخص گاڑی لے کر فرار ہو جاتا ہے۔

سی سی ٹی وی فوٹیج میں واضح ہوا کہ پارکنگ میں لگژری بی ایم ڈبلیو کو با آسانی چوری کر لیا گیا، اور جب روحان خان نے گارڈز سے گاڑی واپس لانے کو کہا تو سب حیرت میں ڈوب گئے کہ گاڑی غائب ہو چکی تھی۔

چوری کی یہ انوکھی واردات ممبئی کے ایک مہنگے ریسٹورینٹ کی پارکنگ میں پیش آئی، جس پر روحان خان نے شدید ناراضگی کا اظہار کیا ہے۔