"میرے پہلے شوہر نشے کے عادی تھے اور انہوں نے مجھے طویل عرصے تک جسمانی و ذہنی تشدد کا نشانہ بنایا۔ میں اس سب کچھ اس لیے برداشت کرتی رہی کیونکہ میرے پاس کوئی اور راستہ نہیں تھا، میں مالی طور پر خود مختار نہیں تھی۔"
معروف ماڈل و اداکارہ دانیا انور نے ایک حالیہ انٹرویو میں اپنی پہلی شادی کی تلخ یادیں اور ذاتی جدوجہد کی کہانی بیان کی۔ سما ٹی وی کے مارننگ شو میں گفتگو کے دوران انہوں نے بتایا کہ ان کی پہلی شادی دردناک تشدد اور مشکلات سے بھری تھی، جس کی وجہ ان کے شوہر کی نشے کی سنگین عادتیں تھیں۔
دانیا نے انکشاف کیا کہ شادی کے ابتدائی دور میں ان کے شوہر صرف ہلکے نشے تک محدود تھے، مگر وقت کے ساتھ ساتھ وہ ہیروئن سمیت دیگر خطرناک نشے کرنے لگے، جس کے باعث ان کے رویے میں تشدد بھی شامل ہوگیا۔ انہوں نے اعتراف کیا کہ اس ظلم کو سہنے کے پیچھے ان کی بے بسی اور معاشی خودمختاری کا نہ ہونا تھا۔
اپنی زندگی کے اس مشکل مرحلے کے بعد دانیا نے طلاق کا فیصلہ کیا، جسے انہوں نے "انتہائی مشکل مگر ضروری قدم" قرار دیا۔ انہوں نے یہ بھی بتایا کہ والدین کی سپورٹ اور بچوں کی ہمت افزائی نے انہیں آگے بڑھنے میں مدد دی، اور دوسری شادی کے بعد انہیں کوئی پچھتاوا نہیں ہے، بلکہ وہ آج زیادہ خوش اور مطمئن ہیں۔
دانیا نے ریئلٹی شو 'تماشا گھر' میں اپنے تجربات کو بھی شیئر کیا اور شو کے سیٹ کو جیل کی مانند قرار دیا۔ ان کی باتوں سے ایک بات واضح ہے – مشکلات کا سامنا کرتے ہوئے بھی ہمت نہ ہارنا اور زندگی کو نئے سرے سے جینے کا عزم کرنا ہی اصل کامیابی ہے۔