بھارتی اداکار گووندا کی اہلیہ سنیتا نے حال ہی میں انکشاف کیا ہے کہ ان کی ایک مداح 20 دن تکہمارے گھر بھیس بدل کر رہتی رہی۔ اس بات کا انکشاف سنیتا آہوجا نے ایک پوڈ کاسٹ کے دوران کیا۔
ان کا کہنا تھا کہ، گووندا کی مداح نوکرانی بن کر ان کے گھر پر رہتی رہی اور انہیں اس بات کا علم تک نہیں ہوا۔
جیسے کہ یہ عام بات ہے کہ ایک سپر اسٹار کے لاکھوں کی تعداد میں مداح ہوتے ہیں جن میں کچھ تو جنون کی حد تک دیوانے بھی ہوتے ہیں، لیکن ان کو کیسے سنبھالنا ہے یہ اس اسٹار پر انحصار کرتا ہے۔
گووندا کی اہلیہ نے تفصیلاً بتایا کہ، "ان کے شوہر کی ایک مداح نے خود کو نوکرانی بتا کر 20 دن تک ان کے گھر میں قیام کیا۔ ایک دن میں نے غور کیا کہ یہ عورت نوکرانی جیسی نہیں لگتی اور وہ صحیح سے برتن بھی نہیں دھو پا رہی تھی۔ میں نے اپنی ساس کو بتایا اور اس کے بارے میں مزید جاننے کی کوشش میں پاگل ہوگئی تھی، بالآخر ہمیں پتہ چلا کہ وہ کسی وزیر کی بیٹی تھی اور گووندا کی مداح تھی۔"
انہوں نے مزید کہا کہ، "یہ لڑکی گووندا کےلیے جاگتی رہتی تھی، پھر ایک دن اس نے روتے ہوئے اعتراف کیا کہ وہ گووندا کی بہت بڑی مداح ہے۔ بعد میں اس کے والد آئے اور ساتھ میں چار گاڑیاں بھر کے سیاستدان بھی لائے، جس کے بعد یہ معاملہ ختم ہوا۔"
واضح رہے کہ گووندا اپنے دور میں ایک سپر اسٹار تھے اور وہ جب دوسرے ممالک جاتے تھے تو کئی خواتین مداح صرف انہیں دیکھ کر بے ہوش ہو جاتی تھیں۔