"میرے پاپا کی شادی بہت دیر سے ہوئی تھی. کیونکہ وہ دادی کی خدمت کررہے تھے. پھر جب دادی انتقال کرگئیں تو 45 برس کی عمر میں ان کی شادی ہوئی. 5 برس بعد بہت منتوں مرادوں سے میری پیدائش ہوئی"
یہ کہنا ہے معروف اداکارہ کومل عزیز خان کا جنھوں حال ہی میں اے آر وائی ڈیجیٹل کے پروگرام ’گڈ مارننگ پاکستان‘ میں شرکت کی اور اپنے مرحوم والد کے متعلق گفتگو کی.
کومل عزیز کا کہنا تھا کہ دو بیٹیوں کی پیدائش کے بعد میرے والد اتنا خوش تھے کہ پاکستانی والد کیا ہوتے ہوں گے. ان کی تو جیسے دنیا ہی بدل گئی تھی۔ میں نے لڑکیوں سے سنا ہے کہ وہ والد سے ڈرتی ہیں لیکن مجھے اپنی ماں سے ڈر لگتا تھا ابا تو پتا تھا کہ ہر چیز میں بہت پیار کرنے والے ہیں۔
اپنی گفتگو جاری رکھتے ہوئے کومل عزیز نے بچپن سے جڑا ایک واقعہ سنایا کہ ایک بار میری سالگرہ منائی جا رہی تھی تو میں نے کچن میں رکھے غبارے اٹھانا چاہے اور میرے اوپر گرم چائے گر گئی جس سے میں جل گئی.
امی نے پھر میرے کپڑے اتار کر ٹھنڈے پانی میں نہلایا اور ایئر کنڈیشنڈ کے سامنے بٹھا دیا لیکن میرے والد اس حال میں دیکھ کر بے ہوش ہوگئے.
کومل عزیز کا کہنا تھا کہ ان کے والد کا انتقال 8 سال پہلے ہوچکا لیکن آج بھی وہ ان کے ساتھ ہیں. وہ اپنے والد سے انتہائی محبت اور انسیت رکھتی تھیں۔