"میری گاڑی، پیسے اور شوٹنگ کے کپڑے تک یہ شخص لے گیا. میں نے بیٹی سے ملنے سے نہیں روکا لیکن گھر میں چوری کے بعد میرے والدین ڈر گئے کہ یہ بچی کو بھی اٹھا کر لے جائے گا. پھر میں کیا کرتی، خودکشی کر لیتی"
یہ کہنا ہے ماضی کی مشہور اداکارہ نشو بیگم کا جنھوں نے بیٹی صاحبہ سے 42 برسوں میں سابق شوہر کی پہلی ملاقات کے بعد ان کی جانب سے لگائے جانے والے الزامات کا منہ توڑ جواب دیا.
نشو نے کہا کہ میری معصوم محبت تھی لیکن جب امریکہ میں خود کو اسٹیبلش کرچکی تب صاحبہ کے والد نے شادی کا پیغام بھیجا. صرف 8،10 لوگ تھے اور ان کے درمیان میرا نکاح ہوا. سسرال والوں نے فلم اداکارہ ہونے کا طعنہ دیا. میں حاملہ تھی اور شادی نبھانا چاہتی تھی لیکن ایسا نہیں ہوا.
نشو بیگم کہتی ہیں کہ یہ الزام جھوٹا ہے کہ میں نے انھیں بیٹی سے ملنے نہیں دیا. جب صاحبہ 5 برس کی تھی تب انھوں نے کہا کہ ایک بار بیٹی دکھا دو تو میں نے دکھا دی. اگر وہ ملنا چاہتے تو جیسے آج ملنے دیا ہے پہلے بھی ملنے دیتی. صاحبہ کی شادی کو 25 برس ہوگئے ہیں اس دوران بھی ربانی صاحب اپنی بیٹی سے مل سکتے تھے.
اپنی گفتگو جاری رکھتے ہوئے نشو بیگم نے کہا کہ آج صاحبہ کا اپنا پارلر ہے وہ صاحب حیثیت ہے تو یہ صاحب ملنے آگئے اگر وہ غریب ہوتی تو مزید 42 سال گزر جاتے یہ نہیں آتا. لیکن میں کہتی ہوں صاحبہ سے کہ تمھارا باپ ہے اس کا علاج کرواؤ جو بھی تمھارا فرض بنتا ہے وہ پورا کرو.
نشو بیگم نے انکشاف کیا کہ مجھے پیغام بھجوایا تھا کہ پیسے لے کر بیٹی ہمیں دے دو. میں کیوں بچی کو سوتیلی ماں کو دیتی میں نے جواب دیا کہ ابھی بچے پیدا کر کے انھیں بیچنے کا کام شروع نہیں کیا.