لمبے گھنے اور صحت مند بال کسی بھی خاتون کی اولین پسند ہوسکتے ہیں کیونکہ بالوں کا خوبصورتی میں بہت اہم کردار ہوتا ہے اور خواتین اپنے بالوں کی نشونما کیلئے طرح طرح کے ٹوٹکے استعمال کرتی ہیں تاہم بھارت میں ایک ایسی خاتون بھی ہیں جن کے بال ان کے قد سے بھی لمبے ہوچکے ہیں۔
بھارتی ریاست اتر پردیش کی 46 سالہ سمیتا شریواستو نے 14 سال کی عمر سے بال نہیں کٹوائے اور اب ان کے بالوں کی لمبائی 7 فٹ اور 9 انچ ہے اور 32 سال سے بال نہ کٹوانے والی بھارتی خاتون نے لمبے بالوں کا گینیز ورلڈ ریکارڈ اپنے نام کرلیا۔
ریکارڈ یافتہ خاتون کا کہنا ہے کہ بھارتی ثقافت میں دیویوں کے روایتی طور پر بہت لمبے بال ہوتے تھے۔ بھارتی معاشرے میں بالوں کا کاٹا جانا بد شگون سمجھا جاتا ہے، اس لیے خواتین بالوں کو بڑھاتی ہیںجبکہ ان کا مستقبل قریب میں اپنے بال کٹوانے کا کوئی ارادہ نہیں ہے۔
سمیتا کا کہنا ہے کہ وہ 1980 کی دہائی کی ہندی فلموں کی اداکاراؤں کے لمبے بالوں کے اسٹائل سے متاثر تھیں، اس لئے میں نے اپنے بال بڑھانا شروع کردیئے اور پچھلے 32 سال سے بال نہیں کٹوائے اور دنیا میں سب سے لمبے بالوں کا ریکارڈ قائم کرنے پر بہت خوشی ہے۔