حکومت نے عالمی منڈی میں تیل کی قیمتوں میں کمی کے بعد پاکستان کے عوام کو بھی سستا تیل فراہم کرنے کا فیصلہ کرلیا ہے جبکہ 16 نومبر سے ملک میں پیٹرولیم مصنوعات کی قیمتوں میں نمایاں کمی متوقع ہے۔
میڈیا رپورٹس کے مطابق انٹرنیشنل مارکیٹ میں تیل کی قیمتیں کم ہونے کی وجہ سے پاکستان میں بھی پیٹرول اور ہائی اسپیڈ ڈیزل کی قیمتوں میں 15 نومبر سے 8 سے 10 روپے فی لیٹر تک کی کمی کا امکان ہے۔
ملک میں مٹی کے تیل کی قیمت میں ساڑھے 4 روپے فی لٹر کمی کا امکان ہے جبکہ لائٹ ڈیزل کی قیمتوں میں بھی 16 روپے 50 پیسے فی لٹر تک کمی ہو سکتی ہے۔
پیٹرولیم مصنوعات کی قیمتوں میں کمی کے حوالے سے اوگرا سمری 15 نومبر کو وزرات پٹرولیم کو بھجوائے گی، وزیراعظم انوار الحق کاکڑ سے مشاورت کے بعدوزارت خزانہ حتمی منظوری دیگی۔
یاد رہے کہ یکم نومبر کو حکومت نے پیٹرولیم مصنوعات کی قیمتوں میں کمی کا عندیہ دیا تھا تاہم بعد ازاں قیمتیں برقرار رکھنے کا فیصلہ کیا گیا تھا جبکہ 16نومبر سے قیمتوں میں کمی کا امکان ظاہر کیا گیا ہے۔