عوام کے شدید رد عمل کے بعد آخر کار پی سی بی نے عمران خان کو ویڈیو میں شامل کر لیا، دیکھئے

ہماری ویب  |  Aug 17, 2023

چودہ اگست پر پاکستان کرکٹ بورڈ کی جانب سے ورلڈ کپ کی ایک خصوصی ویڈیو سے سابق وزیراعظم عمران خان کو غائب ہی کردیا تھا جس کے بعد مشہور شخصیات سمیت عوام کا سخت رد عمل دیکھنے کو ملا۔

تاہم اب پی سی بی نے اپنی غلطی کو تسلیم کرتے ہوئے ورلڈ کپ کی اور ایک اور تفصیلی ویڈیو جاری کردی ہے جس میں عمران خان کو شامل کرلیا گیا ہے۔

سماجی رابطوں کی ویب سائٹ ایکس پر نئی ویڈیو شیئرکرتے ہوئے پی سی بی کی جانب سے واضح کیا گیا ہے کہ ورلڈ کپ 2023 سے قبل پروموشنل مہم شروع کی گئی ہے جس کی ایک ویڈیو 14 اگست 2023 کو اپ لوڈ کی گئی تھی۔

پی سی بی کا کہنا تھا کہ طوالت کی وجہ سے ویڈیو کو مختصر کردیا گیا تھا اورکچھ اہم کلپس غائب تھے۔ اب ویڈیو کے مکمل ورژن میں اس کی اصلاح کردی گئی ہے۔

شائقین کرکٹ کو یہ دیکھ کر حیرت ہوئی تھی کہ ویڈیو میں پاکستان کے لیے 1992 میں ورلڈ کپ جیتنے کا اعزاز حاصل کرنے والی فاتح ٹیم کے کپتان عمران خان شامل ہی نہیں۔

سوشل میڈیا صارفین اور شائقین کرکٹ سمیت پی ٹی آئی حامیوں کی جانب سے بھی پی سی بی کو اس اقدام پر شدید تنقید کا نشانہ بنایا گیا۔ لوگوں کا یہی کہنا تھا کہ پی سی بی نے سابق کپتان عمران خان کو شامل نہ کر کے انتہائی شرمناک حرکت کی ہے جس کی کپتانی میں پاکستان پہلی بار ورلڈ کپ کا فاتح بنا تھا۔

سابق کرکٹ وسیم اکرم نے بھی سخت ردعمل دیتے ہوئے پاکستان کرکٹ بورڈ سے معافی مانگنے کا مطالبہ کیا۔

اس کے بعد جاری کی جانے والی نئی ویڈیو میں عمران خان کو ورلڈ کپ ٹرافی اٹھائے ہوئے دیکھا جاسکتا ہے، اس کے علاوہ کلپس میں ان کی مختلف تصاویر بھی شامل کی گئی ہیں۔

عمران خان کے علاوہ نئی ویڈیومیں مصباح الحق، پاکستان ویمنز ٹیم کی ایشین گیمز میں جیت اور ندا ڈار کا 100 وکٹوں کاریکارڈ بھی شامل ہے۔

مزید خبریں

Disclaimer: Urduwire.com is only the source of Urdu Meta News (type of Google News) and display news on “as it is” based from leading Urdu news web based sources. If you are a general user or webmaster, and want to know how it works? Read More