Getty Images
پاکستان کے وفاقی تحققیاتی ادارے ایف آئی اے نے غیر قانونی طور پر اسرائیل کا سفر کرنے اور مشکوک ترسیلات زر بھجوانے کے الزام میں گرفتار پانچ افراد کی تحقیقات کے دوران دعوی کیا ہے کہ ان افراد نے اسرائیل سے 108 ٹرانزیکشنز کے ذریعے میر پور خاص پوسٹ آفس ایک کروڑ 13 لاکھ روپے بھجوائے۔
واضح رہے کہ ایف آئی اے نے میر پور خاص سے تعلق رکھنے والے پانچ افراد کو حراست میں لیا تھا جن پر الزام تھا کہ انھوں نے غیر قانونی طور پر اسرائیل کا سفر کیا، اور وہاں ملازمت کے ذریعے پاکستان پیسے بھجوائے۔
یہ امر قابل ذکر ہے کہ پاکستان کے پاسپورٹ پر اسرائیل کا سفر نہیں کیا جاسکتا کیونکہ پاکستان نے سفارتی طور پر اسرائیل کو کبھی تسلم نہیں کیا۔
اس مقدمے کی تحقیقات کرنے والی ٹیم میں شامل محمد اقبال نے بی بی سی کو بتایا تھا کہ ایف آئی اے کرائم سرکل کے پاس ’سرکاری ذرائع‘ سے ایک انکوائری آئی تھی کہ پاکستان میں آنے والی ترسیلات زر میں کچھ مشکوک ٹرانزیکشنز ایسی ہیں جو اسرائیل سے آئی ہیں۔
انھوں نے کہا کہ یہ ٹرانزیکشن سنہ 2016 سے سنہ 2021 کے درمیان ہوئی تھیں اور اس معاملے کی دو ماہ تک تحقیقات ہوئیں۔
ایف آئی اے کی جانب سے جمعے کے دن کیس کی تحقیقات کے بارے میں بتایا گیا کہ نامزد ملزمان کے علاوہ ان کے چند اور رشتہ دار بھی اسرائیل جا چکے ہیں اور اب ملزمان کے اہلخانہ کی سفری تفصیلات بھی حاصل کی جا رہی ہیں۔
ایف آئی اے کی جانب سے بتایا گیا ہے کہ کیس کی تحقیقات کے دوران معلوم ہوا کہ ملزمان نےاسرائیل سے 108 ٹرانزیکشنز کے ذریعے میر پور خاص پوسٹ آفس ایک کروڑ 13 لاکھ روپے بھجوائے۔
ایف آئی اے نے ان ٹرانزیکشنز کا ریکارڈ حاصل کرنے کے لیے جی پی او میر پور خاص سے رابطہ کیا ہے۔
ایف آئی اے کے مطابق ملزمان کا ٹکٹ ریکارڈ حاصل کرنے کے لیے پی آئی اے، ایمریٹس ایئر لائن، قطر ایئر لائن اور اتحاد ایئر لائن سے رابطہ کیا گیا ہے جبکہ دفتر خارجہ کے ذریعے کینیا، سری لنکا، سوئٹزر لینڈ اور متحدہ عرب امارات کے سفارت خانوں سے بھی رابطہ کیا گیا ہے تاکہ ملزمان کو جاری ہونے والے ویزا کا ریکارڈ حاصل کیا جا سکے۔
اب تک جن افراد کے خلاف مقدمہ درج کیا گیا ہے ان میں کامران صدیقی، ستارہ پروین، عبدالماجد صدیقی اور محمد اسلم شامل ہیں۔ گرفتار کیے جانے والے افراد کا تعلق صوبہ سندھ کے علاقے میر پور خاص سے ہے۔
ان افراد کے خلاف درج مقدمے میں لکھا گیا ہے کہ ان ملزمان نے ایک اسرائیلی ایجنٹ اسحاق متاط کو اسرائیل میں ملازمت کے لیے تین لاکھ سے لیکر سات لاکھ روپے تک دیے۔ ایف آئی آر کے مطابق گرفتار ہونے والے تمام افراد اسرائیل میں گاڑیاں دھونے کا کام کرتے تھے۔
قابل ذکر امر یہ ہے کہ جن افراد کے خلاف مقدمہ درج کیا گیا ہے ان میں سے چار افراد کے پاس 'شینجن' ویزہ تھے جو کہ 27 یورپی ممالک کے لیے کارآمد ہوتا ہے۔ جس شخص کے پاس یہ ویزہ ہوتا ہے وہ ان 27 ممالک میں سے کسی بھی ملک میں داخل ہو سکتا ہے۔
BBCپاکستان کے پاسپورٹ پر درج ہے کہ یہ پاسپورٹ اسرائیل کے علاوہ دنیا کے تمام ممالک کے لیے کارآمد ہے
ایف آئی آر کے مطابق یہ افراد چار سال تک اسرائیل میں گاڑیاں دھونے کا کام کرتے رہے اور اس عرصہ کے دوران وہ اسرائیلی کرنسی کو پاکستانی روپے میں تبدیل کرواتے اور پھر ویسٹرن یونین کے ذریعے اپنے رشہ داروں کو بھیجتے تھے۔
ایف آئی کے اہلکار کے مطابق 10 ملین روپے سے زیادہ کی رقم ملزمان کی طرف سے اپنے رشتہ داروں کو بھجوائی جا چکی ہے۔
یہ افراد اسرائیل کیسے پہنچے؟
محمد اقبال کے مطابق تحقیقات میں یہ بات سامنے آئی کہ ان ملزمان نے اسرائیل جانے کے لیے ترکی، کینیا، سری لنکا، دوبئی اور سوئٹرز لینڈ کا روٹ اختیار کیا اور ان تمام افراد کو ان ملکوں سے اردن لیکر جانے تک اسرائیلی ایجنٹ اسحاق متاط ان افراد کے ساتھ موجود تھا۔
ایف آئی اے کرائم سرکل کے ذرائع کے مطابق گرفتار ہونے والے پانچ ملزمان کا دو دن کا جسمانی ریمانڈ حاصل کیا گیا ہے اوران ملزمان سے ہونے والی اب تک کی تحقیقات میں یہ بات سامنے آئی ہے کہ یہ ملزمان جب اردن پہنچ جاتے تو وہاں پر ان کی ایسے ممالک کی جعلی دستاویزات بنائی جاتی تھیں جنھوں نے اسرائیل کو تسلیم کیا ہوا ہے۔
ان دستاویزات کے ذریعے وہ بارڈر کراس کرکے اسرائیل میں داخل ہوئے تھے۔
ایف آئی اے کے اہلکار کے مطابق دوران تفتیش یہ بات بھی سامنے آئی ہے کہ اس اسرائیلی ایجنٹ کے اردن میں بھی انسانی سمگلروں کے ساتھ تعلقات تھے جن کی معاونت سے ایسے ممالک کی جعلی دستاویزات حاصل کی جاتی تھیں جنھوں نے اسرائیل کو تسلیم کیا ہوا ہے۔
گرفتاری کیسے ہوئی؟
تفتیشی ٹیم میں شامل محمد اقبال کے مطابق گرفتار ہونے والے افراد چار سال اسرائیل میں رہے۔
ان کا کہنا ہے کہ واپسی کے لیے ان افراد نے اپنا پاکستانی پاسپورٹ ہی استعمال کیا۔
ملزم محمد انور کے خلاف درج مقدمے میں کہا گیا ہے کہ وہ پہلے اردن، پھر دوبئی اور پھر پاکستان واپس آئے۔
محمد اقبال نے بی بی سی کو بتایا کہ ملزمان نے اپنی جعلی دستاویزات ضائع کر دی ہیں جبکہ ان کے زیر استعمال موبائل فون اور لیپ ٹاپ سے کچھ ڈیٹا حاصل کیا گیا ہے جو تحقیقات کو آگے بڑھانے میں مدد دے گا۔
ایف آئی اے کے ایک اور اہلکار کے مطابق ملزمان واپسی کے بعد میر پور خاص میں جنرل سٹور اور موبائل نیٹ ورکنگ کا کام کر ر ہے تھے۔
ایف آئی اے حکام کے مطابق ملزمان کا جسمانی ریمانڈ مکمل ہونے کے بعد انھیں دوبارہ متعقلہ عدالت میں پیش کیا جائے گا اور اس معاملے کی مذید تحقیقات کے لیے عدالت سے ملزمان کے مذید جسمانی ریمانڈ کی استدعا کی جائے گی۔