پاکستان شوبز انڈسٹری کے معروف اداکار زاہد احمد نے اپنے یوٹیوب چینل پر ایک ویڈیو جاری کی جس میں انہوں نے اپنی ناک کی سرجری کروانے کو بہت بڑی غلطی قرار دیا۔
جاری کردہ ویڈیو میں زاہد احمد نے لوگوں کو مشورہ دیتے ہوئے کہا کہ جو لوگ پلاسٹک سرجری کروانے کا سوچ رہے ہیں وہ لاکھ مرتبہ اس حوالے سے سوچیں اور اللہ تعالیٰ کی عطا کردہ نعمتوں کا دل سے شکر ادا کریں۔
زاہد احمد نے بتایا کہ ویڈیو کا موضوع ہے کہ میں نے اپنی ناک کیسے کٹوائی؟ آج میں جس موضوع پر بات کررہا ہوں وہ میرے لئے انتہائی مشکل ہے، لیکن یہ چینل بناتے ہوئے میں نے خود سے وعدہ کیا تھا کہ میں خود سے صرف سچ بولوں گا۔
اداکار کا کہنا تھا کہ اب میری ناک کی ساخت بالکل بھی پہلے جیسی نہیں رہی البتہ اللہ کا شکر ہے کہ اس نے میری عزت رکھی اور میرے کام میں کوئی پریشانی پیدا نہیں ہوئی، یہ اللہ کی مہربانی تھی کہ اس واقعے کے بعد میں نے احساس کیا کہ اللہ تعالیٰ کو زندگی کے فیصلوں سے الگ کر کے آپ آگے نہیں چل سکتے۔
انہوں نے بتایا کہ اس واقعے کو تقریباً 2 سال گزر چکے ہیں، ناک خراب ہونے کے بعد 6 مہینے انتظار کیا اور پھر ایک سرجری کروائی اور پھر ایک سال انتظار کیا۔
زاہد احمد نے سوشل میڈیا ایپ انسٹاگرام پر اپنی دس سال پرانی تصویر بھی شئیر کی۔