عالمی وبا کورونا وائرس کے خطرے کے پیشِ نظر نافذ کئے جانے والے لاک ڈاؤن کے باعث پاکستان کے معروف فلمی اداکار مہیب مرزا، صنم سعید، شمعون عباسی اور سارہ لورین اپنی فلم عشرت میڈ ان چائینا کی ٹیم کے ہمراہ تھائی لینڈ میں پھنس گئے تھے تاہم حکومت پاکستان سے اپیل کے بعد ان اداکاروں کو پوری ٹیم کے ساتھ پاکستان صحیح سلامت وطن واپس پہنچا دیا گیا۔
اداکاروں کے وطن واپس لوٹنے کے بعد احتیاطی تدابیر کو مدنظر رکھتے ہوئے ان کے کورونا وائرس ٹیسٹ لئے گئے۔
شمعون عباسی نے فیس بک پر پوسٹ کرتے ہوئے لکھا کہ ان کے اور پوری ٹیم کے کورونا ٹیسٹ کی رپورٹ منفی آئی ہے۔
شمعون عباسی نے نیشنل انسٹیٹیوٹ آف ہیلتھ کی دی گئی نئی اپ ڈیٹ ٹوئٹر پر شئیر کرتے ہوئے لکھا کہ تھائی لینڈ سے پی کے 8893 پرواز سے پاکستان آنے والے تمام مسافروں کے کورونا ٹیسٹ منفی آئے ہیں اور اب سب ہوٹلز سے اپنے گھروں کو روانہ ہو چکے ہیں۔
دوسری جانب اداکارہ صنم سعید کا بھی ٹوئٹ سامنے آیا جس میں انہوں نے کورونا وائرس کے ٹیسٹ کے حوالے سے لکھا اور ساتھ ہی ڈپٹی کمشنر اسلام آباد کا بھی شکریہ ادا کیا۔