میں نے اس سے بدترین وقت نہیں دیکھا، پوری دنیا ایک چھینک اور کھانسی کے ڈر سے۔۔۔۔ انور مقصود نے انٹرویو میں کیا کہا ؟ جانیں

دنیا بھر میں پھیلنے والے کورونا وائرس کے حوالے سے پاکستان کے نامور مصنف اور میزبان انور مقصود نے ایک انٹرویو میں بات کی، جس میں ان کا انداز پہلے سے کافی منفرد نظر آیا۔

انور مقصود کا کہنا تھا کہ مجھے آج کل ٹیلی ویژن پر کھانے پکانے کے تیل کے اشتہارات دیکھ کر بہت افسوس ہوتا ہے، ان اشتہارات میں لوگ بہترین پکوان تیار کرتے نظر آتے ہیں، میں ٹی وی چینلز سے درخواست کرتا ہوں کہ اس وقت اس قسم کے اشتہارات نشر نہ کئے جائیں، پاکستان میں اس وقت بہت سے افراد ایسے ہیں جن کے گھروں میں کھانے کے لئے کچھ بھی موجود نہیں۔

ان کا کہنا تھا کہ میں نے اس سے زیادہ بدترین وقت نہیں دیکھا، پوری دنیا صرف ایک چھینک اور کھانسی کے ڈر سے گھروں میں محدود ہو کر رہ گئی ہے۔

معروف مصنف انور مقصود کا کہنا تھا کہ ہمیں سمجھنا چاہئے کہ دنیا بھر میں ہی لاک ڈاؤن نافذ ہے، عبادت گاہیں بند کی جارہی ہیں، تو پھر مساجد کیسے بند نہیں ہوں گی؟ ہمارے گھروں کے دروازے کیسے بند نہیں ہوں گے؟ اگر ہم ابھی خیال کرلیں گے تو سب کچھ جلد واپس کھل جائے گا۔