بالی ووڈ کے کامیاب ترین اداکار امیتابھ بچن نے اپنی خواہش کا اظہار کرتے ہوئے کہا کہ کاش وہ سُپر مین بن جائیں اور اِس مہلک کورونا وائرس کو پوری دُنیا سے مٹا دیں۔
بالی ووڈ فلم انڈسٹری کے شہنشاہ امیتابھ بچن نے سوشل میڈیا اکاؤنٹ ٹوئٹر پر اپنی جوانی کی ایک دلچسپ تصویر شئیر کی، جس میں وہ سُپر مین کے لباس کے جیسا لباس زیب تن کئے ہوئے ہیں۔
امیتابھ بچن کی جانب سے شئیر کی گئی پرانی تصویر اُن کے بیٹے ابھیشیک بچن کی ایک سالگرہ کی تقریب کی ہے اور تصویر میں دیکھا جاسکتا ہے کہ امیتابھ بچن ہاتھ میں کیمرہ لیے تقریب کے مناظر کیمرے میں محفوظ کر رہے ہیں۔
انہوں نے اپنے ٹوئٹ کے کیپشن میں لکھا کہ یہ تصویر ان کے بیٹے ابھیشیک کے ابتدائی برسوں کی ایک سالگرہ کی تقریب کی ہے جس کو ہم نے لباس پارٹی کا نام دیا تھا، سب نے مختلف کپڑے پہنے تھے اور میں نے سُپر مین کی تھیم کا لباس پہنا تھا۔
امیتابھ بچن نے لکھا کہ کاش میں حقیقت میں سُپر مین بن جاؤں اور اِس جان لیوا وبائی مرض کا دُنیا سے خاتمہ کر دوں۔