ہیری پوٹر سیریز میں مرکزی کردار نبھانے والے اداکار ڈینیل ریڈ کلف نے کرونا وائرس سے متاثر ہونے کی افواہوں پر خاموشی توڑ دی۔
عالمی میڈیا پر یہ خبر گردش میں تھی کہ ہالی ووڈ اسٹار نے کرونا وائرس کی علامات ظاہر ہونے کے بعد ٹیسٹ کروایا جس کی رپورٹ مثبت آئی۔
سوشل میڈیا ویب سائٹ پر اس بات کا دعویٰ کیا جا رہا تھا کہ ڈینیل ریڈ کلف ہالی ووڈ کے پہلے اداکار ہیں جو کرونا وائرس سے متاثر ہوئے۔
اطلاعات کے مطابق ایک نامور نشریاتی ادارے کے نام سے جعلی اکاؤنٹ بنایا گیا جس نے ایک ٹوئٹ کے ذریعے ڈینیل ریڈ کلف کو کورونا کا مریض قرار دیا۔
ایک روز بعد ریڈ کلف نے خاموشی توڑتے ہوئے اور ان تمام خبروں کی تردید کرتے ہوئے کہا کہ وہ بالکل ٹھیک اور تندرست ہیں، سوشل میڈیا پر چلنے والی افواہیں بے بنیاد ہیں۔
ذرائع کے مطابق ڈینیل ریڈ کلف کے ترجمان نے ٹوئٹر کے ذریعے خبر کو جھوٹ قرار دیتے ہوئے تصدیق کی کہ اداکار بالکل ٹھیک ہیں لہٰذا اکاؤنٹ کے خلاف سخت ایکشن لے کر اسے فوری طور پر بلاک کیا جائے۔