پاکستان شوبز انڈسٹری کی نامور اداکارہ ماہرہ خان حال ہی میں شعیب منصور کے بنائے گئے ایک گانے کی ویڈیو میں نظر آرہی ہیں۔ گیت کے بول اور دھن علامہ اقبال کی ایک مشہور نظم لب پہ آتی ہے دعا کے طرز پر تحریر کی گئی ہے۔
اس ویڈیو میں دعا کے ذریعے خواتین کے جذبات کی ترجمانی کی گئی ہے جبکہ گانے کا ٹائٹل دعائے ریم' یعنی 'دلہن کی دعا' رکھا گیا ہے۔'
گانے کی ویڈیو میں دکھایا گیا ہے کہ دلہن کی شادی کے دوران سنگیت کی تقریب جاری ہے جس میں کچھ خواتین بہترین انداز میں دلہن کے لیے گانوں کی صورت میں دعا گو ہیں اور تقریب میں موجود لوگ دعا دینے کے انداز سے بہت محظوظ ہوتے نظر آرہے ہیں۔
گانے کی ویڈیو میں دلہن (ماہرہ خان) خواتین کی جانب سے کی جانے والی دعا کے دوران نہایت بے بس اور سہمی ہوئی دکھائی دے رہی ہیں جہاں وہ ایک دم سب کو چپ کروا کر کہتی ہیں کہ کیسی ہولناک دعا کی جا رہی ہے، ہماری دعا ہم خود کریں گے۔
اگلے ہی لمحے ماہرہ خان خود اسی نظم کی طرز پر دعا کرتی ہوئی دکھائی دے رہی ہیں۔