پاکستان سپر لیگ میں کل کھیلے جانے والے کوئٹہ گلیڈی ایٹرز اور پشاور زلمی کے مابین میچ میں غیر ملکی کھلاڑی بین کٹنگ کے آؤٹ پر نو بال چیک کرنے کیلئے وکٹ پر لگے اسٹمپ کیمرے کا غلط ری پلے چلا دیا گیا ، غلط ری پلے چلانے پر کئی سوشل میڈیا صارفین نے پی سی بی کو تنقید کا نشانہ بنایا ہے۔
پاکستان سپر لیگ میں کوئٹہ کی ٹیم پشاور کے خلاف پندرویں اوور میں 171 رنز کا ہدف مکمل کرنے کے لئے کوششیں کر رہی تھی، ایسے میں آسٹریلین کھلاڑی بین کٹنگ گلیڈی ایٹرز کی جیت کئے لئے بہترین بلے بازی کا مظاہرہ کر رہے تھے لیکن دوسری اننگز کے گیارہویں اوور کی چوتھی بال پر وہ مڈ وکٹ پر لیونگ اسٹون کے ہاتھوں کیچ آؤٹ ہو کر اپنی وکٹ گنوا دیتے ہیں۔
باؤلنگ پر وہاب ریاض کی نوبال چیک کرنے کیلئے ری پلے کا سہارا لیا گیا اور مختلف کیمراز کی مدد سے بار بار دیکھ کر یہ فیصلہ کیا گیا کہ وہاب ریاض نے نو بال نہیں کی ، لیکن غور کرنے پر معلوم ہوا کہ جو ری پلے اسکرین پر چلایا گیا وہ اصل آؤٹ نہیں تھا۔
میچ میں سائیڈ کیمرے سے جب دیکھا گیا تو یوں لگا کہ شاید نو بال ہوسکتی ہے، تاہم شک کو دور کرنے کیلئے اسٹمپ والے کیمرے کا ری پلے دیکھا تو محسوس ہوا کہ شاید باؤلر کا پیر لائن کے اندر ہی ہے۔
مگر ایسا کیوں لگ رہا تھا ؟ کیوں کہ ری پلے میں چلنے والے شاٹس دو الگ الگ گیند کے تھے، لیکن سائیڈ کیمرے کا ری پلے اس بال کا تھا جس بال پر بین کٹنگ آؤٹ ہوئے تھے جبکہ محمد نواز نان اسٹرائیکر اینڈ پر کھڑے تھے۔
اسٹمپ کیمرے کے دوبارہ ری پلے پر نان اسٹرائیکر پر بین کٹنگ ہی نظر آئے، لیکن اگر شاٹ بھی انہوں نے ہی مارا تو وہ خود نان اسٹرائیکر اینڈ پر کیسے ہو سکتے ہیں؟؟
دونوں اینگلز میں نان اسٹرائیکر اینڈ پر کھڑے بیٹسمین نے جو بیٹ تھاما ہوا تھا اس پر اسٹیکرز بھی مختلف تھے ، اور نظر آنے والے کھلاڑیوں میں سے ایک پوری آستین کی قمیص پہنے ہوئے ہے جبکہ دوسرا آدھی آستین کی قمیص میں ملبوس ہے۔
اسے انسانی غلطی بھی کہہ سکتے ہیں مگر امپائرز کی جانب سے اس کی ہی بنیاد پر ممکنہ طور فیصلہ کیا گیا۔