امریکی ٹیکنالوجی کمپنی مائیکروسافٹ نے فلسطینی شہریوں کی نگرانی کے لیے اپنی ٹیکنالوجی کے غلط استعمال پر اسرائیلی فوج کے خفیہ انٹیلی جنس یونٹ کی کلاؤڈ اور اے آئی سروسز تک رسائی بلاک کر دی ہے۔
کمپنی کے مطابق اسرائیلی یونٹ نے مائیکروسافٹ کی Azure کلاؤڈ اور ڈیٹا پلیٹ فارم کو استعمال کرتے ہوئے فلسطینیوں کے موبائل فون ریکارڈز اور ذاتی معلومات اکٹھی کیں جو کمپنی کی پالیسیوں اور شرائط کی خلاف ورزی ہے۔
مائیکروسافٹ کے صدر بریڈ اسمتھ نے کہا کہ یہ فیصلہ برطانوی اخبار دی گارڈین کی ایک تحقیقاتی رپورٹ کے بعد کیا گیا جس میں انکشاف ہوا کہ اسرائیلی فوج کا خفیہ یونٹ 8200 فلسطینیوں کی جاسوسی اور نگرانی کے لیے مائیکروسافٹ ٹیکنالوجی استعمال کر رہا تھا۔
رپورٹ کے مطابق اس ٹیکنالوجی کے ذریعے اسرائیلی فوج فلسطینیوں کے مقام، نقل و حرکت اور ذاتی معلومات تک رسائی حاصل کر کے انہیں اپنے مقاصد کے لیے استعمال کرتی تھی۔
یہ پہلا موقع ہے کہ کسی بڑی امریکی ٹیک کمپنی نے اسرائیلی فوج کو فلسطینی حقوق کی خلاف ورزی پر براہِ راست پابندی عائد کی ہے۔