فیڈرل بورڈ آف ریونیو نے سوشل میڈیا پر دولت کی نمائش کرنے والے ایک لاکھ سے زائد افراد کا ڈیٹا جمع کر لیا ہے۔ حکام کے مطابق ایسے افراد جو مہنگی گاڑیوں، بنگلوں، زیورات اور شاہانہ تقریبات کی نمائش کرتے ہیں لیکن انکم ٹیکس گوشوارے جمع نہیں کراتے اب ایف بی آر کے ریڈار پر آگئے ہیں۔
ذرائع کے مطابق ایف بی آر کی سوشل میڈیا لائف اسٹائل مانیٹرنگ ٹیم نے مہنگے ملبوسات، زیورات، گھڑیوں، قیمتی گاڑیوں اور شادیوں پر بڑے اخراجات کرنے والے نان فائلرز کی فہرستیں تیار کر لی ہیں۔ نادرا نے بھی ان افراد کی شناخت میں ایف بی آر کی مدد کی ہے۔
حکام کا کہنا ہے کہ شادیوں میں بیس بیس ہزار ڈالر مالیت کے سوٹ استعمال کیے جا رہے ہیں اور نوٹ نچھاور کرنے کی ویڈیوز سوشل میڈیا پر وائرل ہوتی ہیں لیکن ان کے گوشواروں میں یہ سب ظاہر نہیں کیا جاتا۔ ایسے تمام افراد کے اخراجات، کریڈٹ اور اے ٹی ایم کارڈز کے استعمال اور بیرون ملک سفر کی تفصیلات بھی ایف بی آر کے پاس موجود ہیں۔
ایف بی آر کا کہناہے کہ یکم اکتوبر سے نان فائلرز کے خلاف کارروائی شروع کی جائے گی۔ حکام کے مطابق مجموعی گوشواروں میں سے 80 فیصد کا آڈٹ ہوگا اور دولت کی نمائش کرنے والوں کو اپنے آمدنی کے ذرائع بتانے ہوں گے۔
انکم ٹیکس گوشوارے جمع کرانے کی آخری تاریخ 30 ستمبر مقرر کی گئی ہے اور ایف بی آر نے واضح کر دیا ہے کہ اس میں کسی قسم کی توسیع نہیں کی جائے گی۔