ڈسٹرکٹ اینڈ سیشن کورٹ اسلام آباد میں ٹک ٹاکر سمعیہ حجاب کیس میں گرفتار ملزم حسن زاہد کی ضمانت کی درخواستوں پر سماعت آج بھی مؤخر ہوگئی۔
ملزم کی جانب سے دونوں زیرِ سماعت مقدمات میں ضمانت کی درخواستیں دائر کی گئی تھیں جو جوڈیشل مجسٹریٹ یاسر محمود چوہدری کی عدالت میں مقرر تھیں۔ مدعیہ سمعیہ حجاب عدالت میں پیش نہ ہو سکیں جس پر عدالت نے فریقین کو نوٹسز جاری کرتے ہوئے سماعت 15 ستمبر تک ملتوی کر دی۔
ذرائع کا کہنا ہے کہ سمعیہ حجاب اور حسن زاہد کے درمیان صلح ہوچکی ہے اور متاثرہ خاتون آئندہ سماعت پر عدالت میں صلح نامہ اور بیانِ حلفی جمع کروائیں گی۔ آج سماعت نہ ہونے کے باعث صلح نامہ ریکارڈ پر نہیں لایا جا سکا۔