صدرِ پاکستان آصف علی زرداری نے 11ویں قومی مالیاتی کمیشن (این ایف سی) کی تشکیل میں تبدیلی کی منظوری دے دی ہے۔
ایوانِ صدر سے جاری بیان کے مطابق حکومت بلوچستان کی جانب سے نان ایکس آفیشیو رکن کی تبدیلی کی گئی جس کے تحت محفوظ علی خان کو 11ویں این ایف سی کا نیا رکن نامزد کیا گیا۔ صدر کی منظوری کے بعد سابقہ نامزدگی منسوخ ہوگئی۔
ترجمان ایوانِ صدر کا کہنا ہے کہ صدر آصف علی زرداری نے کرمنل لاز ترمیمی بل 2025ء کی بھی توثیق کر دی ہے۔علاوہ ازیں صدر نے پاکستان لینڈ پورٹ اتھارٹی بل 2025ء کی بھی منظوری دے دی ہے۔
واضح رہے کہ چند روز قبل صدر مملکت نے 11واں قومی مالیاتی کمیشن تشکیل دیا تھا جس میں چاروں صوبوں کے وزرائے خزانہ اور صوبوں کے ایک ایک ماہر کو بھی کمیشن میں شامل کیا گیا۔