تربیلا ڈیم کے اسپل وے آج دوبارہ کھولے جائیں گے، آبادی کو الرٹ رہنے کی ہدایت

پراونشل ڈیزاسٹر مینجمنٹ اتھارٹی خیبر پختونخوا نے کہا ہے کہ تربیلا ڈیم سے آج دوپہر ڈھائی بجے اسپِل وے دوبارہ کھولے جائیں گے۔

پی ڈی ایم اے کے مطابق ڈیم سے پانی کے اخراج سے پانی کی سطح 160,000 سے 260,000 کیوسک تک پہنچنے کا امکان ہے۔ دریائے سندھ اور اس سے منسلک ندی نالوں میں طغیانی کا خدشہ ہے، پی ڈی ایم اے نے ضلعی انتظامیہ کو مقامی آبادی کو الرٹ رکھنے کی ہدایت کی ہے۔

پی ڈی ایم اے نے کہا ہے کہ عوام دریاؤں اور ندی نالوں کے قریب جانے سے گریز کریں، ماہی گیر اور مویشی پال افراد محفوظ مقامات پر منتقل ہو جائیں، والدین کو ہدایت کی گئی ہے کہ بچوں کو ندی نالوں کے قریب جانے سے روکیں۔

سیاح اور مقامی افراد کو کہا گیا ہے کہ پی ڈی ایم اے کی ہدایات پر عمل کریں، کسی بھی نا خوشگوار اور ہنگامی صورتحال میں پی ڈی ایم اے کی ہیلپ لائن 1700 پر رابطہ کیا جائے۔

پی ڈی ایم اے نے مزید کہا ہے کہ عوام صرف مستند ذرائع سے معلومات حاصل کریں اور افواہوں سے گریز کریں۔