پھینکنے میں ارشد ندیم سے بھی آگے ہیں۔۔ نادیہ خان کے ایئر وائس مارشل اورنگزیب سے پرانی رشتے داری نکالنے پر صارفین کے طنز

"میرے شوہر ہمیشہ کہتے تھے کہ اُن کا ایک بھائی اور بھی ہے جس سے وہ بےپناہ محبت کرتے ہیں، نام ہے اورنگزیب۔ اور جب میری اُن سے ملاقات ہوئی، تو سمجھ آئی کہ یہ شخص واقعی خاص ہے،" نادیہ خان نے جذباتی انداز میں یہ بات اپنے مارننگ شو رائز اینڈ شائن میں کہی، جب وہ ایئر وائس مارشل اورنگزیب احمد کے بارے میں گفتگو کر رہی تھیں۔

پاکستان اور بھارت کے درمیان حالیہ فضائی کشیدگی میں جس شخصیت نے سب کی توجہ حاصل کی، وہ پاک فضائیہ کے باوقار افسر اورنگزیب احمد تھے۔ ان کی پروفیشنل بریفنگز اور پراعتماد انداز نے نہ صرف عوام کو متاثر کیا بلکہ سوشل میڈیا پر ان کی مقبولیت کو بھی آسمان پر پہنچا دیا۔ ہر شخص جاننا چاہتا ہے کہ آخر یہ شخصیت ہے کون؟ ان کے کیریئر کیسی کامیابیوں سے بھرا ہے؟ اور نجی زندگی میں یہ کیسے انسان ہیں؟

اسی دوران ان کی اہلیہ کے ساتھ ایک سادہ مگر پُراثر تصویر وائرل ہوئی جس پر پاکستانی سوشل میڈیا صارفین نے اس جوڑی کی سادگی اور خوبصورتی کو خوب سراہا۔ بات یہیں ختم نہیں ہوئی—اداکارہ نادیہ خان نے بھی ان کی شخصیت پر روشنی ڈالی اور یہ بتایا کہ ان کے شوہر فیصل اور اورنگزیب احمد نہ صرف پرانے دوست ہیں بلکہ ایک دوسرے کو بھائیوں جیسا مانتے ہیں۔

"فیصل اور اورنگزیب گھنٹوں بات کیا کرتے تھے، میں نے چار سال تک اُن کا نام سنا، اور جب آخر کار ان سے ملی تو محسوس ہوا جیسے برسوں سے جانتی ہوں۔ اُن کی گفتگو میں وطن سے محبت ایسے جھلک رہی تھی جیسے کوئی وردی میں نہیں بلکہ دل میں پرچم سجا کے بیٹھا ہو،" نادیہ نے بڑے فخر سے بتایا۔

اورنگزیب احمد کی کہانی محض کسی اعلٰی عہدے دار کی نہیں، بلکہ ایک ایسے شخص کی ہے جس نے 1992 میں پاک فضائیہ میں کمیشن حاصل کیا اور آج اس مقام پر ہیں کہ انہیں نہ صرف فیصلے کرنے کا اختیار حاصل ہے بلکہ ان پر اعتماد بھی کیا جاتا ہے۔ وہ نہ صرف جنگی اسکواڈرن کی قیادت کر چکے ہیں، بلکہ بین الاقوامی سطح پر سعودی عرب میں پاکستان کی نمائندگی بھی کر چکے ہیں۔

ان کی علمی وابستگی بھی بے مثال ہے—چین سے ملٹری آرٹس اور نیشنل ڈیفنس یونیورسٹی اسلام آباد سے نیشنل سیکیورٹی و وار اسٹڈیز میں ماسٹرز کر چکے ہیں۔ اس کے ساتھ ساتھ نئی نسل کے افسران کی تربیت میں بھی ان کا کردار کلیدی رہا ہے۔

سوشل میڈیا پر ان کے بیانات، انداز گفتگو، اور حب الوطنی سے بھرپور انداز کو لے کر بےشمار میمز، ویڈیوز اور تاثرات سامنے آ چکے ہیں۔ جہاں ایک طرف عوام ان کی تصویر کو سلام کر رہی ہے، وہیں معروف شخصیات بھی ان کے اخلاق، فہم و فراست اور پیشہ ورانہ برتری کو خراج تحسین پیش کر رہی ہیں۔

آج وہ ڈپٹی چیف آف دی ایئر اسٹاف (آپریشنز) کے منصب پر فائز ہیں، اور ان کی خدمات کے صلے میں انہیں ستارۂ امتیاز (ملٹری) جیسا اعلٰی اعزاز بھی دیا جا چکا ہے۔

اور ہاں، جیسے نادیہ خان نے ہنستے ہوئے کہا:

"ویسے تو دشمنوں کو چائے پلاتے ہیں، لیکن ہمیں اپنے گھر کی خاص جلیبیاں کھلائیں۔" ایسا ظرف، ایسی مہارت، اور ایسی سادگی... یہی اورنگزیب احمد کی اصل پہچان ہے۔