"آج کے شو میں ہمارے خاص مہمان ہیں پیارے اور وفادار کتے! دیکھیے کیسے یہ معصوم ساتھی خوشیاں بکھیرتے ہیں۔ یہ قسط آپ یقیناً مِس نہیں کرنا چاہیں گے!"
اداکارہ و میزبان فضا علی نے حال ہی میں اپنے لائیو مارننگ شو کی ایک ویڈیو شیئر کی، جس میں وہ کتوں پر مبنی دلچسپ موضوع پر گفتگو کرتی نظر آئیں۔ تاہم، شو کا مرکزی خیال سائیڈ پر رہ گیا اور توجہ کا مرکز بن گئی فضا علی کی لباس میں اختیار کی گئی بولڈ اسٹائلنگ۔
فضا نے سیاہ اور نیلے رنگ کی شیفون کی ہلکی سی تھرو (see-through) قمیض زیب تن کی، جس کے نیچے نہ صرف ان کی بانہیں نمایاں تھیں بلکہ پیٹ کا کچھ حصہ بھی واضح نظر آ رہا تھا۔ اس ویڈیو نے عوامی حلقوں میں شدید تنقید کو جنم دیا۔
سوشل میڈیا صارفین نے اداکارہ پر خوب تنقید کی۔ ایک صارف نے لکھا، "انتہائی سستا لباس ہے۔" ایک اور نے مشورہ دیا، "ایسا لباس پہننے سے بہتر ہوتا کہ آپ اندر کوئی بڑی سی شرٹ یا بنیان پہن لیتیں۔"
کسی نے فضا کی عمر کا حوالہ دے کر کہا، "یہی اداکارائیں جب بڑی ہوتی ہیں تو اور بھی بے باک ہو جاتی ہیں۔" ایک صارف کا تبصرہ تھا، "رمضان میں تو بڑی نیک بن کر آتی ہیں، اور بعد میں لباس دن بہ دن چھوٹا ہوتا جاتا ہے۔"
ایک اور صارف نے نشاندہی کی، "دوپٹہ صرف رمضان میں نہیں، پورے سال پہننا چاہیے۔" جبکہ ایک خاتون صارف نے لکھا، "ہماری میڈیا انڈسٹری میں ہر قسم کی خواتین ہیں، جو ہر موقع کے حساب سے اپنا حلیہ بدل لیتی ہیں۔ رمضان میں یہی عورت ہمیں اسلام بھی سکھائے گی“
اگرچہ فضا علی نے اس شو کو کتوں جیسے وفادار اور معصوم جانوروں سے منسوب کیا، مگر ناظرین کی نگاہوں کا محور بن گیا ان کا لباس۔ اس معاملے نے ایک بار پھر یہ سوال کھڑا کر دیا ہے کہ عوامی شخصیات کو اپنی پوشاک کے انتخاب میں کس حد تک محتاط رہنا چاہیے، خاص طور پر جب وہ براہِ راست پروگرامز میں شرکت کر رہی ہوں۔
فضا علی نے تاحال اس تنقید کا کوئی جواب نہیں دیا، لیکن سوشل میڈیا پر بحث تاحال جاری ہے اور بظاہر اس کا اختتام جلدی ہوتا نظر نہیں آتا۔